Allahşükür Paşazadə: "Zəvvarlarımız 100-200 kiloqram yüklə qayıdırlar”

“Bu ilki Həcc ziyarəti zamanı zəvvarlarımızın bizi çətin vəziyyətə saldıqları məqamlardan biri də ziyarətdən qayıdarkən gətirdikləri yükün limitdən çox olması ilə bağlı oldu. Baqaj üçün bütün dünyada qəbul olunmuş limit 30 kiloqramdır, bundan artığına icazə verilmir. Bizim zəvvarlarımız isə 100-200 kiloqram yüklə qayıdır və deyirlər ki, mənim baqajım mütləq Azərbaycana aparılmalıdır. Belə olduqda isə uçuşa icazə verilmir və bundan bileti həmin təyyarəyə alınan, 10-20 kiloqramlıq əşyası olan digər zəvvarlar əziyyət çəkirlər. İnsan ya Həccə getməlidir, ya da alverə”. Bunu Qafqaz Müsəlmanları İdarəsinin (QMİ) sədri Şeyxülislam Allahşükür Paşazadə deyib. Şeyx bildirib ki, Həcc ziyarətindən əvvəl QMİ tərəfindən zəvvarlar üçün xüsusi hazırlıq kursları keçirilir: “Təəssüf ki, zəvvarlarımız bu kurslara biganə yanaşırlar və ziyarət zamanı bəlli olur ki, təlimatlardan xəbərsizdilər. Biz öz borcumuzu yerinə yetiririk. Ancaq gələcəkdə bu məsələlərə baxılmalıdır”.