Almaniya hökuməti Çinlə bağlı Strategiyanı təsdiqləyib.
Bu barədə Almaniya xarici işlər naziri Annalena Berbok bildirib.
"Çin son illərdə bəlkə də digər ölkələrlə müqayisədə daha sürətlə dəyişib. Çini dinləyən hər kəs onun bu əsrin inkişafını formalaşdıracaq özgüvənini bilir. Çin Strategiyası ilə biz özümüzə bu ölkə ilə münasibətlərimiz üçün kompas veririk. Biz Çin ilə əlaqəni kəsmək istəmirik, risklərimizi minimuma endirmək istəyirik. Buraya iqtisadiyyatımızı Avropada təşviq etmək, eləcə də asılılıqları azaltmaq daxildir. Nə qədər müxtəlif ticarət və təchizat zəncirləri qurularsa, ölkəmiz bir o qədər dayanıqlı olar. Müstəqilliyimiz üçün qlobal tərəfdaşlıqlara sərmayə qoyuruq. Biz xammalın yeni həddən artıq istismarını istəmirik, əksinə hər iki tərəfin faydalanacağı ədalətli ticarət istəyirik. Buraya ədalətli, davamlı ticarət üçün standartlar təyin edə biləcəyimiz azad ticarət müqavilələri daxildir", o bildirib.
Almaniya xarici işlər naziri xanım Berbok vurğulayıb ki, onun ölkəsi Çin ilə işləmək istəyir. "Çünki bizim Çinə ehtiyacımız var, amma Çinin də Avropada bizə ehtiyacı var. Bu, bizim iqtisadi inkişafımıza və ədalətli rəqabətə, eləcə də iqlim böhranının qarşısını almağa aiddir, bu sahədə yalnız Çinlə birlikdə uğur qazanıla bilər".
Berbok qeyd edib ki, Çin Strategiyası hökumətdə, Bundestaqda, bələdiyyələrdə, biznesdə, elm sahəsində, QHT-lər və beynəlxalq tərəfdaşlarla aparılan geniş müzakirələrin nəticəsidir.
///Apa
