İspaniyanın "Atletiko" klubunda forma geyinən Anxel Korrea karyerasını başqa komandada davam etdirməyə hazırlaşır.
AZXEBER.COM xarici mediaya istinadən xəbər verir ki, 10 ildir Madrid təmsilçisinin heyətində çıxış edən argentinalı futbolçu oyun praktikasının azalması səbəbindən ayrılmaq qərarı verib.
2026-cı il dünya çempionatı öncəsi daha çox şans qazana biləcəyi bir komandaya keçmək istəyən 30 yaşlı oyunçunun xidmətində "Qalatasaray" və "Fənərbağça" maraqlıdır. Argentina mətbuatının yaydığı məlumata görə, Türkiyə klublarından əlavə Meksikanın "Tiqres" klubu da hücumçu ilə danışıqlara başlamağı planlaşdırır.
"Atletiko" rəhbərliyi isə Korreanın gedişinə razıdır və futbolçunu uyğun qiymətə satmağa hazır olduğunu bildirib. Hər iki İstanbul nəhəngi yaxın günlərdə rəsmi təklif göndərə bilər.
Qeyd edək ki, Anxel Korrea bu mövsüm bütün turnirlərdə 39 oyunda meydana çıxıb, ümumilikdə 1254 dəqiqə oynayıb. O, 7 qol və 5 məhsuldar ötürmə ilə yadda qalıb.
