İspaniyanın "Real-Madrid" klubunun yarımmüdafiəçisi Arda Gülər gələcəyi ilə bağlı yayılan söz-söhbətlərə aydınlıq gətirib.
AZXEBER.COM xəbər verir ki, Türkiyə millisinin Macarıstanla keçirdiyi Millətlər Liqası matçından sonra "Marca" nəşrinə danışan 20 yaşlı futbolçu "kral klubu"nda qalmaq niyyətində olduğunu bildirib:
"Real Madrid" mənə bir plan təqdim edib və mən hələ də bu plana inanıram. Burada uğurlu olacağıma əminəm. Artıq Madrid şəhərində ev də almışam. Çox çalışıram və hər zaman oynamaya hazıram".
Türkiyə millisinin üzvü azarkeşlərin ona göstərdiyi dəstəyə də toxunub:
"Real" azarkeşlərini sevirəm. Onların mənə verdiyi dəstək çox önəmlidir. Bu komandaya oynamaq və onun bir parçası olmaq üçün gəlmişəm. Hədəfimə çatana qədər mübarizəni dayandırmayacağam".
Arda komandasının mövsüm sonuna qədərki məqsədlərini də açıqlayıb:
"Üç kubok uğrunda mübarizə aparmağa hazırıq. "Real Madrid" hər zaman hər oyunu və turniri qazanmaq üçün mübarizə aparır. Mənim şəxsi arzum isə hər matçda oynamaq və komandama çempionluq yolunda kömək etməkdir".
Qeyd edək ki, Arda Gülər bu mövsüm "Real Madrid"in heyətində 30 oyunda 3 qol və 5 məhsuldar ötürmə ilə yadda qalıb.
