Son illər Ermənistanda insan hüquqlarının pozulması halları kütləvi xarakter alıb. Bunu Ermənistanın Helsinki Komitəsinin sədri, hüquq müdafiəçisi Avetik İşxanyan "Sputnik Ermənistan”ın sorğusuna cavab olaraq ölkədə insan hüquqlarının müdafiəsi sahəsindəki problemləri şərh edərkən deyib.
Onun fikrincə, son üç il ərzində Ermənistanın hüquq sistemi (polis, istintaq orqanları, prokurorluq, MTN) icra başçıları tərəfindən "özəlləşdirilib” və hüquq-mühafizə orqanları qanunu və vətəndaşların hüquqlarını qorumaq əvəzinə, əsasən onların göstərişlərini yerinə yetirirlər.
"Dinc toplaşmaq hüququ heç vaxt indiki qədər kobud şəkildə pozulmayıb. Belə bir vəziyyətdə fundamental insan haqları haqqında danışmaq gülüncdür”, - deyə İşxanyan bildirib.
O, həmçinin xatırladıb ki, Ermənistan konstitusiyaya görə sosial dövlət hesab olunur, lakin ölkədə vətəndaşların sosial hüquqları pozulur. Bunu internat məktəblərinin və tibb müəssisələrinin optimallaşdırılması bəhanəsi ilə bağlanması sübut edir.
"Yoxsulluğun artması fonunda sosial vəziyyət, yumşaq desək, məyusedicidir”, - hüquq müdafiəçisi əlavə edib.
İşxanyanın fikrincə, ilk növbədə siyasi elitanın vəziyyəti düzəltmək istəyi olmalıdır. Çünki fundamental hüquqlar barədə məlumatlı olmağı yalnız xalqdan tələb etmək absurddur.
"Hazırda Ermənistanda diktator Mussolini prinsipi "Dostlara - hər şey, qalanlarına – qanun” fəaliyyət göstərir. Dövlətin insan hüquqlarına həqiqətən hörmət etməsi və müstəqil məhkəmə sistemi yaratmaq üçün islahatlar aparması üçün ictimai şüur və hakimiyyətə ictimai təzyiq formalaşdırmaq lazımdır”, - deyə hüquq müdafiəçisi qeyd edib.
Bu kontekstdə o, məhkəmənin müstəqilliyinin vacibliyini qeyd edir. İşxanyanın fikrincə, məhkəmə hakimiyyəti icra hakimiyyətindən tam müstəqil olmalıdır. Çünki insan hüquqlarının pozulmasına yol verən icra hakimiyyətidir.
"İnsan hüquqları hakimiyyətlə insanlar arasında "şaquli” adlandırılan münasibətlərə bağlı qaydalardır. Söz azadlığı pozulduqda, insana işgəncə verildikdə, o, qanunsuz olaraq azadlıqdan məhrum edildikdə, nəticədə bu, insan hüquqlarının dövlət tərəfindən pozulması hesab olunur. Müstəqil məhkəmə isə ədalətli olaraq vətəndaşların hüquqlarını bərpa etməyə və pozuntuları aradan qaldırmağa borcludur”, - deyə hüquq müdafiəçisi bildirib.
Xatırladaq ki, 1948-ci il dekabrın 10-da BMT Baş Assambleyası Ümumdünya İnsan Hüquqları Bəyannaməsini qəbul edib. 1950-ci ildən Baş Assambleyanın təklifi ilə bütün dünya bu tarixi Beynəlxalq İnsan Hüquqlarının Müdafiəsi Günü kimi qeyd edir.
///Oxu.az
