Bu barədə "N-t"v telekanalı meteoroloqlara istinadla məlumat yayıb.
İyunun 28-də saat 16 radələrində (Bakı vaxtı ilə 18:00) Almaniya-Polşa sərhədində, Brandenburq əyalətinin Koşen yaşayış məntəqəsində yerləşən DWD meteoroloji stansiyası 41.7 dərəcə temperatur qeydə alıb.
İyunun 26-da ilk maksimum göstərici Saarbrükkendə 41.3 dərəcə olub, şənbə günü isə Saksoniya-Anhalt federal torpağının Drevits yaşayış məntəqəsində temperatur 41.5 dərəcəyə çatıb. Meteoroloq Karsten Brandtın fikrincə, bu, son hədd deyil. Termometrlərin göstəricisi daha da yüksələ bilər.
Bundan əlavə, iyunun 28-nə keçən gecə Almaniyada meteoroloji müşahidələr tarixinin ən isti gecəsi olub. Şərqi Saksoniyadakı Kubşüts kommunasında gecə temperatur 29.4 dərəcə təşkil edib.
Avstriyanın paytaxtı Vyanada da temperatur tarixi maksimumunu yeniləyərək iyunun 28-də 40 dərəcəyə çatıb. Avstriyanın Hava Mərkəzinin məlumatına görə, yerli vaxtla saat 17:00-da (Bakı vaxtı ilə 19:00) temperaturun pik həddi İnereştadt rayonunda qeydə alınıb. Avstriya paytaxtında əvvəlki temperatur rekordu 2013-cü ildə qeydə alınmışdı. Həmin vaxt termometrlər 39.5 dərəcə göstərmişdi.
Bundan başqa, Polşanın şimalındakı Torun şəhərində havanın temperaturu 40.3 dərəcəyə çataraq tarixi maksimumu yeniləyib. Əvvəlki temperatur rekordu 1921-ci il iyunun 29-da qeydə alınmışdı. Həmin vaxt Polşanın qərbində yerləşən Proşkov şəhərində havanın temperaturu 40.2 dərəcəyə çatmışdı.
/Oxu.az
