Avropanın ən nüfuzlu klub turniri - Çempionlar Liqasının qrup mərhələsi başlayır. Bu gün turnirdə 8 oyun keçiriləcək.
Bu il qrup mərhələsində mübarizə aparmaq hüququnu daha çox İngiltərə (“Çelsi”, “Mançester Yunayted”, “Arsenal”, “Mançester Siti”) və İspaniya (“Real”, “Valensiya”, “Barselona”, “Malaqa”) klubları qazanıblar. Almaniya (“Borrusiya”(Dortmund), “Şalke”, “Bavariya”), Portuqaliya (“Portu”, “Benfika”, “Braqa”) və Fransa (“Lill”, “Monpelye”, “Pari Sen-Jermen”) üç, İtaliya (“Yuventus”, “Milan”), Ukrayna (“Dinamo” (Kiyev), “Şaxtyor”) və Rusiya (“Spartak”, “Zenit”) iki klubla təmsil olunur. Xorvatiya (“Dinamo” (Zaqreb)), Yunanıstan (“Olimpiakos”), Belçika (“Anderlext”), Hollandiya (“Ayaks”), Danimarka (“Nordşelland”), Belarus (BATE), Şotlandiya (“Seltik”), Rumıniya (ÇFR) və Türkiyənin (“Qalatasaray”) bir klubu ən nüfuzlu turnirin kuboku uğrunda yarışacaq.
Çempionlar Liqasında qələbələrin sayına görə İspaniya liderdir. Onun klubları, daha dəqiqi, “Barselona” və “Real” 13 dəfə turnirin qalibi olublar. İtaliya və İngiltərə isə bir qələbə fərqlə geridədirlər.
Turnirin ən təcrübəlit iştirakçısı “Real”dır. “Kral klubu” Çempionlar Liqasında 44-cü dəfədir mübarizə aparır. “Benfika” (32) və Kiyev “Dinamo”su “Real”dan xeyli geri qalır. “Ayaks” və “Bavariya” 30-cu dəfədir turnirə qatılır. “Nordşelland”, “Monpelye” və “Malaqa”nın ev stadionları Çempionlar Liqasının məşhur himnini ilk dəfə eşidəcək.
Çempionlar Liqasının qrup mərhələsində 32 komanda 8 qrupa bölünüb. Qrupların qalibləri və ikinci yeri tutan klublar pley-off mərhələsində mübarizəni davam etdirəcəklər. Turnirin həlledici oyunu mayın 25-də Londondakı “Uembli” stadionunda keçiriləcək. Bu stadion 2011-ci ildə də final oyununa ev sahibliyi etmişdi.
