Rəqəmsal yayıma keçid üçün hazırlıq gedir. Rəqəmsal yayıma keçəndən sonra hökumətin müvafiq strukturları əhaliyə 10-dək xarici telekanaldan ibarət paket təklif edəcək, qalan kanalların isə yayımına imkan verilməyəcək. Rəqəmsal yayımın tələblərinə cavab verməyən televizorların da idxalı dayandırılacaq. Bir sıra hüquqi və texniki məsələlər hökumətin müvafiq strukturları ilə razılaşdırılıb.
Bu addıma səbəb ölkə ərazisində televiziya kanallarının rəqəmsal yayıma keçidi ilə bağlıdır. Bu işə dair dövlət proqramının tərkib hissəsi olan bu tədbirlərin ölkədə televiziya qəbuledicilərinin qiymətində hər hansı bahalaşma yaradacağı proqnozlaşdırılmır.
Nazirlər Kabinetindən bildirirlər ki, yaxın bir-iki ilə peyk antenalarının da ölkəyə idxalının dayandırılacağı gözlənir. Ondan sonra evlərimizin damında və eyvanlarında peyk antenaları olmayacaq.
Fikir belədir ki, peyk antenalarının sayı çoxalıb və şəhərin görünüşünə xələl gətirir. Eyvanlara, damlara yerləşdirilən çanaq antenaları şəhərin arxitekturasına xələl gətirməklə yanaşı, binaların damındakı bacalara və digər kommunal sistemlərin fəaliyyətinə əngəl yaradır.
Çanaq antenaları idxalının dayandırılması ilə rəqəmsal yayımın əhatə dairəsi genişlənəcək və kabel televiziyası inkişaf etdiriləcək. Proses çərçivəsində binalarda vətəndaşların qurduğu çanaq antenalarının kollektiv antenalarla əvəzlənməsi həyata keçiriləcək. Xatırladaq ki, "peyk antenaları"nın yığışdırılacağına dair bir müddət əvvəl rabitə və informasiya texnologiyaları naziri Əli Abbasov da açıqlama vermişdi.
Rabitə və İnformasiya Texnologiyaları Nazirliyinin mətbuat xidmətinin rəhbəri Müşfiq Əmirov bildirib ki, ölkə əhalisinin 40 faizindən çoxunun peyk kanallarına baxmaq imkanı yoxdur. Amma peyk antenalarına qoyulan yasaq tamaşaçı hüquqlarının pozulması kimi izah edilmir. Nazirlik elə sistem quracaq ki, keyfiyyətli peyk kanalına baxmaq üçün əlavə vəsait xərclənməyəcək.
Rəqəmsal yayımın tələblərinə cavab verməyən televizorların idxalının dayandırılmasına gəlincə, Müşfiq Əmirov bildirib ki, hazırda satışda olan televizorların əksəriyyətinin rəqəmsal yayım imkanı var.
"Ayna" qəzeti
