Azərbaycanlı Həkimlər və Təbib Tələblər” İctimai Birliyinin sədri Vüqar Yaqublu hepatit virusu ilə bağlı AZXEBER.COM portalının suallarını cavablandırıb.
Azərbaycanda virus hepatitlərindən qorunmaq üçün hansı işlər görülür?
Azərbaycanda virus hepatitlərindən qorunmaq üçün ictimai təşkilatlar tərəfindən bu sahədə çoxlu işlər aparılır. Bütün digər inkişaf etmiş ölkələr - Amerika, Böyük Britaniya və.s digər ölkələrdə İctimai Birliklər viruslarla mübarizə üçün bir sıra tədbirlər həyata keçirirlər və şübhəsiz ki, dövlət də onlara öz maliyyə yardımını göstərir. Azərbaycanda da bu istiqamətdə işlər gedir, amma bu çox yüksək səviyyədə həyata keçirilmir. Çünki, elə sahələr vardır ki, təbliğata geniş yer verilir, daha çox diqqət ayırılır. Amma, elə sahələr də, var ki diqqətdən kənarda qalır. Hepatit virusları da son iki ilə qədər belə sahələrdən birinə çevrilib. Lakin indi vəziyyət dəyişib. Fərqli ictimai təşkilatlar, klinikalar bu sahədə təbliğat aparırlar. Doğrudur, bəzi klinikaların bu sahədə təbliğat aparmasının səbəbi maddi marağın olmasıdır. Bu da təbii qarşılanmalıdır. Əsas odur ki, insanların diqqətini cəlb edirlər, insanları müayinə edilməyə yönləndirirlər. Müayinə olunmaq isə çox vacibdir. Çünki, “Hepatit C” virusu kimi viruslar olduqca təhlükəlidir.
Azərbaycanda bu xəstəlik hansı səviyyəyə çatıb?
Bilirsiniz, mən sırf bu sahə ilə məşğulam və mənim xəstələrimdən 1/5də hepatit B və C aşkarlanır. Bizdə dəqiq statistika yoxdur. Lakin bu yaxınlarda səhiyyə Nazirliyinin mətbuat xidmətinin açıqlaması oldu. Və bu açıqlamada göstərilirdi ki, bir ildə Azərbaycanda hər min nəfərdən 400-ü hepatitə yoluxub. Lakin mən bu rəqəmlərə inanmıram. Çünki bu yalnız qeydiyyata düşən rəqəmlərdir. Bu xəstəliyə yoluxmuş, lakin qeydiyyatdan keçməmiş insanları nəzərə alaraq bunu əminliklə deyə bilərəm ki, bu virusa yoluxanların sayı olduqca çoxdur. Biz bunun üçün işlər görürük və ümidavarıq ki, yaxın gələcəkdə bu rəqəmlərin ortaya çıxması üçün müəyyən işlər həyata keçirəcəyik.
Ülkər Eldarqızı
