Festivalla bağlı Əməkdar artist, Mədəniyyət və İncəsənət Universitetinin dosenti Azad Şükürov AZXEBER.COM-a eksklüziv açıqlama verib. O teatr festivalının əhəmiyyətindən danışıb: “Bu çox gözəl ideyadır. Mən düşünürəm ki, vətənpərvərlik insanlara lap körpəlikdən aşılanmalıdır. Daha sonra isə bu bağçalarda, məktəblərdə, universitetlərdə sistemli şəkildə davam etməlidir. Layihənin Milli Qəhrəman Mübariz İbrahimovun əziz xatirəsinə həsr olunması ikiqat sevindiricidir. Mən bu ilin əvvəlində Mübarizin evində oldum. Onun ailəsi ilə tanış oldum. Onlar Mübariz kimi oğul yetişdirdiklərinə görə xoşbəxt idilər. Məncə hər bir Azərbaycan gənci Mübarizin hərəkətlərindən dərs almalıdır”. 

Azad Şüküröv layihənin gənclər tərəfindən həyata keçirilməsinə də münasibət bildirib: “Təşəbbüsün gənclər tərəfindən gəlməsi çox sevindirici haldır. Gənclərin vətənlərini belə çox sevməsinə, vətən üçün xeyirli layihələr keçirməsinə çox sevinirəm. Biz müharibə şəraitində yaşadığımızdan vətənimizə daha çox bağlı olmalıyıq. Mirzə Ələkbər Sabirin heç bir şeirində vətən sözü yoxdur. Amma kaş ki, hamımız vətənimizi ən azı onun qədər sevək. Vətəni sözdə yox, əməldə sevmək lazımdır. İnsanlara təsir etmək üçün teatr çox güclü vasitədir. Əminəm ki, bu festival gənclərdə vətənpərvərlik hissini daha da artıracaq”.

Azad müəllim təklif gələcəyi halda böyük məmnuniyyətlə festivalda iştirak edəcəyini də vurğulayıb: “Layihənin inkişafı naminə əlimdən gələn hər şeyi etməyə hazıram. Əgər təklif gəlsə böyük məmnuniyyətlə gənclərə yardım edəcəm”

Qeyd edək ki, layihənin ideya müəllifi, millət vəkili Jalə Əliyevadır. Layihə Gənclər və İdman Nazirliyinin və Mədəniyyət və Turizm Nazirliyinin dəstəyi ilə icra olunur.

Layihədə iştirak etmək istəyən 35 yaşınadək gənclər ssenarilərini və qrup üzvlərinin koordinatlarını [email protected] elektron ünvanına göndərə bilərlər. Ssenarilər hekayə, roman, pyes şəklində ola bilər. Layihənin media tərəfdaşları arasında AZXEBER.COM İnformasiya portalı da var.

Hacıbəy HEYDƏRLİ