"Ölkəmizin enerji, nəqliyyat və digər sferalarda qazandığı tarixi nailiyyətlər gücümüzə güc qatır. Vaxtilə xəritədə kiçik bir yer tutan bu ölkə bu gün qlobal, dünya əhəmiyyətli layihələr həyata keçirməklə sanki materikin mərkəzinə çevrilib. Bu bir tarixdir ki, 20 il ərzində Azərbaycan ilk dəfə olaraq Xəzər dənizini Aralıq dənizi ilə birləşdirən kəmər təşəbbüsü ilə çıxış etdi və qonşuları ilə birlikdə onu istismara verdi. Bütün bunlar da Prezident İlham Əliyevin uzaqgörən və düşünülmuş siyasətinin nəticəsidir”.
Bu sözləri AZXEBER.COM-a açıqlamasında deputat Vüqar İskəndərov deyib.
Deputatın fikirlərinə görə, İlham Əliyevin Londondakı forumda çıxışı Azərbaycan qazının Avropaya daha çox ixrac edilməsi üçün əlavə imkanlar yaradır:
"Prezident İlham Əliyevin "Avropa Siyasi Birliyi”nin 4-cü Zirvə toplantısı çərçivəsində "Enerji və bağlantı” mövzusunda dəyirmi masada çıxışı zamanı qeyd etdiyi kimi Azərbaycan qazının daha çox Avropa ölkəsinə ixrac edilməsi üçün əlavə imkanlar yaranır və bizim Avropaya qaz təchizatımızın 2027-ci ilin sonuna qədər ikiqat artırılmasını nəzərdə tutulur. Hələ 2 il əvvəlki göstəricilərlə müqayisədə biz rəqəmlərlə müqayisə etsək, bu inkişafı görürük. 2021-ci ildə Avropa qitəsinə bizim qaz təchizatımız ildə 8 milyard kubmetr təşkil edirdisə, bu il bu göstərici 13 milyard kubmetrə yaxın olacaq. Bu baxımdan Avropa ölkələri ilə tərəfdaşlıq və bu tərəfdaşlığıın yüksələn xətlə inkişafı qarşılıqlı güvən və dostluğun nəticəsidir".
Parlament üzvü bildirib ki, son zamanlar qaz təchizatında yeni tərəfdaşımız meydana çıxıb:
"Azərbaycanın təbii qazını alan səkkiz ölkədən beşi - Bolqarıstan, Yunanıstan, İtaliya, Macarıstan və Rumıniya Avropa İttifaqının üzvüdür. İkisi İttifaqa daxil olmaq üçün namizəd ölkədir - Gürcüstan və Serbiya, eləcə də Türkiyə. Son vaxtlar isə yeni daha bir tərəfdaşımız meydana çıxıb. Azərbaycan bir neçə aya Sloveniya bazarına daxil ola biləcək. Artıq bu bir reallıqdır ki, ölkəmizin lazımi resursları və infrastrukturu var, habelə daha da inkişaf etdirilir. Bu baxımdan biz etibarlı tərəfdaş olaraq Avropanın qaz təchizatında mühüm pay sahibi olmaq yolunda addımlayırıq”.
Mikayıl Mirzəzadə
