Azərbaycan polisi – təhlükəsizliyin və sabitliyin etibarlı təminatçısıdır

Azərbaycanın əldə etdiyi mühüm nailiyyətlərdən biri də məhz təhlükəsizlik mühitinin etibarlı şəkildə qorunması, ictimai sabitliyin və vətəndaşların rahatlığının təmin edilməsidir. Bu istiqamətdə Azərbaycan polisi  mühüm və məsuliyyətli fəaliyyət həyata keçirirlər. Ölkəmizdə ictimai asayişin yüksək səviyyədə qorunması, cinayətkarlığa qarşı ardıcıl mübarizə və vətəndaşların hüquq və azadlıqlarının etibarlı müdafiəsi dövlət siyasətinin mühüm istiqamətlərindəndir.

 

Azərbaycanın sabitlik və təhlükəsizlik modeli bu gün ölkəyə gələn xarici qonaqların və turistlərin də təhlükəsizliyinə öz müsbət təsirini göstərir. Paytaxt Bakı ilə yanaşı, Azərbaycanın regionlarında da insanların gündəlik həyatının rahat və təhlükəsiz təşkili, ictimai məkanlarda asayişin qorunması ölkənin beynəlxalq turizm və investisiya imicinin möhkəmlənməsinə xidmət edir. Son illərdə dünyada ən sürətlə yayılan təhlükələrdən biri kibercinayətkarlıqdır. Rəqəmsal texnologiyaların həyatımızın bütün sahələrinə nüfuz etməsi ilə yanaşı, kiberdələduzluq, şəxsi məlumatların qanunsuz əldə edilməsi, elektron hesabların ələ keçirilməsi, fişinq və digər kibercinayət formaları da genişlənir. Azərbaycan polisi bu yeni çağırışların qarşısında ənənəvi hüquq-mühafizə yanaşmaları ilə kifayətlənmir. Daxili İşlər Nazirliyinin aidiyyəti strukturları, xüsusilə kibercinayətkarlıqla mübarizə istiqamətində fəaliyyət göstərən Kibər Polis rəqəmsal mühitdə cinayətlərin aşkarlanması, qarşısının alınması və araşdırılması üzrə mühüm işlər həyata keçirirlər.

Kibercinayətkarlığa qarşı mübarizə artıq yalnız cinayət törədildikdən sonra müdaxilə etmək deyil, həm də qabaqlayıcı tədbirlərin görülməsini, rəqəmsal izlərin peşəkar təhlilini, beynəlxalq informasiya mübadiləsini və vətəndaşların maarifləndirilməsini tələb edir. Bu baxımdan Azərbaycan polisinin rəqəmsal cinayətlərlə mübarizə imkanlarının gücləndirilməsi ölkənin ümumi milli təhlükəsizlik sisteminin mühüm elementidir. Xüsusilə maliyyə və bank məlumatlarının oğurlanmasına yönəlmiş kiberdələduzluq hallarının artdığı bir dövrdə vətəndaşların rəqəmsal təhlükəsizliyinin qorunması sosial əhəmiyyət daşıyan məsələyə çevrilib. Polis tərəfindən həyata keçirilən əməliyyat-axtarış tədbirləri ilə yanaşı, əhalinin kibertəhlükəsizlik barədə məlumatlandırılması da bu mübarizənin mühüm tərkib hissəsidir.

Azərbaycan polisinin prioritet istiqamətlərindən biri də narkotik vasitələrin və psixotrop maddələrin qanunsuz dövriyyəsinə qarşı mübarizədir. Xüsusilə gəncləri hədəfə alan narkotik şəbəkələrinin fəaliyyətinin qarşısının alınması yalnız hüquq-mühafizə məsələsi deyil, eyni zamanda cəmiyyətin sağlam gələcəyinin qorunması məsələsidir. Polis tərəfindən narkotik vasitələrin qanunsuz dövriyyəsi ilə məşğul olan şəxslərin və qrupların müəyyənləşdirilməsi, onların zərərsizləşdirilməsi və qanun qarşısında məsuliyyətə cəlb olunması istiqamətində ardıcıl əməliyyat tədbirləri həyata keçirilir. Bu mübarizənin mahiyyəti yalnız narkotik maddənin müsadirə olunması və cinayətkarın saxlanılması ilə bitmir. Əsas məqsəd narkotik şəbəkələrinin maliyyə və logistika kanallarının dağıdılması, yeni şəxslərin bu təhlükəli şəbəkələrə cəlb olunmasının qarşısının alınması və xüsusilə gənc nəslin narkomaniyadan qorunmasıdır.

İnsan alveri müasir dövrün ən ağır transmilli cinayətlərindən biridir. Bu cinayət insanın azadlığına, ləyaqətinə və fundamental hüquqlarına qarşı yönəldiyinə görə dövlətlərin xüsusi diqqətini tələb edir. Azərbaycanın insan alverinə qarşı mübarizə siyasətində hüquq-mühafizə tədbirləri ilə yanaşı, qurbanların müdafiəsi, onların cəmiyyətə reinteqrasiyası və preventiv fəaliyyət də mühüm yer tutur.

Bu istiqamətdə İnsan Alverinə Qarşı Mübarizə Baş İdarəsinin fəaliyyəti xüsusi əhəmiyyət daşıyır. Baş İdarə insan alveri ilə məşğul olan cinayətkar qrupların müəyyən edilməsi, onların fəaliyyətinin qarşısının alınması, zərərçəkmiş şəxslərin müəyyənləşdirilməsi və müdafiəsi istiqamətində kompleks tədbirlər həyata keçirir.

İnsan alverinə qarşı mübarizənin effektivliyi həm də beynəlxalq əməkdaşlıqdan asılıdır. Çünki bu cinayətin iştirakçıları və qurbanları müxtəlif ölkələrlə əlaqəli ola bilər. Azərbaycan tərəfinin beynəlxalq hüquq-mühafizə qurumları ilə əməkdaşlığı, məlumat və təcrübə mübadiləsi bu sahədə mübarizənin səmərəliliyini artıran mühüm amillərdəndir. Burada əsas fəlsəfə aydındır: cinayətkarın cəzalandırılması ilə yanaşı, insanın qorunması dövlət siyasətinin mərkəzində dayanmalıdır.

Hüquq-mühafizə orqanlarının fəaliyyətinin əsas meyarlarından biri yalnız cinayətlərin açılması deyil, cəmiyyətin həmin qurumlara olan etimadıdır. Azərbaycan polisinin gündəlik fəaliyyəti də məhz vətəndaşların təhlükəsizliyinin, hüquq və qanuni mənafelərinin qorunmasına xidmət edir. Bu gün ölkəmizdə ictimai sabitliyin hökm sürməsi, insanların gündəlik həyatlarını təhlükəsiz şəraitdə davam etdirməsi, ölkəyə gələn turistlərin və xarici qonaqların özlərini rahat hiss etməsi təhlükəsizlik sisteminin səmərəliliyinin mühüm göstəricilərindəndir. Azərbaycan polisi həm küçələrdə, həm sərhədyanı və regionlarda, həm də artıq yeni təhlükə məkanı olan kiberməkanda dövlətin hüquq-mühafizə funksiyasını həyata keçirir. Onun qarşısında duran vəzifələr dəyişdikcə peşəkarlıq, texnoloji imkanlar və beynəlxalq əməkdaşlıq da yeni səviyyəyə yüksəlir.

 

Qlobal təhlükəsizlik mühitinin sürətlə dəyişdiyi bir vaxtda Azərbaycan polisinin qarşısında da yeni prioritetlər formalaşır. Kibercinayətkarlıqla mübarizədə texnoloji imkanların genişləndirilməsi, süni intellekt və rəqəmsal analitika alətlərindən istifadə, narkotiklərin onlayn kanallarla yayılmasının qarşısının alınması, insan alverinin yeni formalarının erkən müəyyən edilməsi bu prioritetlər sırasındadır.

Bununla yanaşı, profilaktik fəaliyyətin gücləndirilməsi, xüsusilə gənclər arasında narkomaniya və kibertəhlükələr barədə maarifləndirmənin artırılması da mühüm əhəmiyyət daşıyır. Müasir polis yalnız cinayətə reaksiya verən deyil, cinayətin baş verməsinin qarşısını əvvəlcədən almağa çalışan peşəkar və çevik hüquq-mühafizə institutu olmalıdır. Azərbaycanın ictimai-siyasi sabitliyi, təhlükəsizliyi və hüquq qaydasının qorunması dövlət siyasətinin fundamental istiqamətlərindəndir. Bu siyasətin həyata keçirilməsində Azərbaycan polisinin üzərinə böyük məsuliyyət düşür. Xüsusi ilə vurğulamalıyıq ki, Azərbaycan polisinin fəaliyyəti yalnız asayişin qorunması ilə ölçülmür.

 

Bu fəaliyyət vətəndaşın özünü təhlükəsiz hiss etməsi, turistin ölkəmizdə rahat hərəkət etməsi, gəncin narkotik təhlükəsindən qorunması, insan alveri qurbanının müdafiə olunması və vətəndaşın kiberməkanda hüquqlarının təmin edilməsi kimi çox mühüm istiqamətləri əhatə edir. Məhz bu yanaşma dövlətlə cəmiyyət arasında etimad körpüsünü möhkəmləndirir. Azərbaycan polisinin peşəkarlığı, prinsipiallığı və müasir çağırışlara uyğunlaşmaq bacarığı ölkəmizdə sabitliyin və təhlükəsizliyin əsas dayaqlarından biri olaraq qalır. Xalqın öz polisinə olan inamı və hörməti isə bu məsuliyyətli xidmətin ən mühüm mənəvi dayağıdır.