Fevralın 1-də Azərbaycan-Şimali Kipr Türk Respublikası (ŞKTR) Dostluq Cəmiyyətinin Girnə şəhərindəki Azərbaycan Beynəlxalq Mədəniyyət Mərkəzində təşkil olunan tədbirində ŞKTR-nin Prezidenti Ərsin Tatar, Türkiyənin ŞKTR-dəki səfiri Yasin Əkrəm Sərin, Azərbaycan Milli Məclisinin deputatları - Anar İsgəndərov, Jalə Əliyeva, Azərbaycan Mətbuat Şurasının sədri Rəşad Məcid və digər qonaqlar iştirak ediblər.
AZXEBER.COM xəbər verir ki, tədbirin əvvəlində şəhidlərin xatirəsi bir dəqiqəlik sükutla yad edilib, Türkiyə və Azərbaycanın dövlət himnləri səsləndirilib. Qonaqları salamlayan Azərbaycan-ŞKTR Dostluq Cəmiyyətinin rəhbəri Orxan Həsənoğlu Azərbaycanla Şimali Kipr arasında əlaqələrin hər keçən gün daha da inkişaf etdiyini vurğulayıb, ŞKTR-nin prezidenti Ərsin Tatarın mərkəzi dəfələrlə ziyarət etdiyini diqqətə çatdırıb: "ŞKTR-nin Türk Dövlətləri Təşkilatına (TDT) müşahidəçi qismində daxil olması türk respublikaları ilə əməkdaşlığın daha da inkişaf edəcəyinə ümid yaradır. Biz bu günə qədər Qarabağın işğal faktına yönəlmiş tədbirlər keçirir, uğradığımız haqsızlıqları dünya ictimaiyyətinə çatdırmaq üçün əlimizdən gələni edirdik. Rəşadətli ordumuz cənab Ali Baş Komandan İlham Əliyevin rəhbərliyi ilə çoxillik işğalı sonlandırdıqdan sonra diqqətimizi türk dünyasının başqa bir yarasına - Kipr yarasına yönəldirik. Bütün səylərimizi birləşdirərək Şimali Kipr Türk Respublikasına qarşı haqsızlıqları dünyaya çatdırmağa davam edirik. Biz Türk respublikalarından başlayaraq bütün dünyada ŞKTR-nin varlığının qəbul etdiriləcəyinə ümid bəsləyirik. Arzu edirik ki, bir gün Azərbaycanın da burada səfirliyi olsun”.
Türkiyənin ŞKTR-dəki səfiri Yasin Əkrəm Sərin ölkəsinin ŞKTR ilə münasibətləri barədə danışıb. ŞKTR-nin TDT-də müşahidəçi qismində təmsil olunmasının əhəmiyyətini qeyd edən səfir Azərbaycan Prezidenti İlham Əliyevin "Kiprli qardaşlarımızın yanında olacağıq" açıqlamasını xatırladıb, onun qətiyyətli siyasətinin önəmindən bəhs edib.
Şimali Kipr Türk Respublikasının prezidenti Ərsin Tatar çıxışına qonaqları salamlayaraq başlayıb. Azərbaycan, Özbəkistan, Qazaxıstan, Qırğızıstan və Avropada məskunlaşmış türkləri ölkədə görməkdən məmnunluq duyduğunu dilə gətirən prezident qeyd olunan ölkələrlə münasibətlərin qurulması və inkişafı üçün diplomatik təmasların davam etdirildiyini bildirib. O, Kiprdə ikidövlətli həll istiqamətində addımlar atıldığını diqqətə çatdırıb. Prezident türk dünyasında əlifba və dil birliyinin möhkəmlənməsi ilə gələcək nəsillərin iqtisadi, ticarət, mədəni və milli bağlarının inkişaf edəcəyinə inandığını vurğulayıb.
Tədbirdən sonra qonaqlar Şimali Kiprin abidələrini və görməli məkanlarını ziyarət ediblər.
