"Azərbaycan turizmi artıq inkişaf dövrünü yaşayır"Rövşən Tağıyev: "Qarşıdakı illər ərzində ölkəyə gələcək turistlərin sayı daha da artacaq"
Müasir dünyada turizm hər bir ölkə üçün iqtisadiyyatın ən dinamik inkişaf edən sahələrindən biri sayılır. Azərbaycanda da bu sahənin inkişafına ciddi diqqət göstərilməkdədir. Bəllidir ki, artıq turizm bütün dünyada ən gəlirli sahələrdən birinə çevrilib. Turizm sektorunun davamlı olaraq inkişaf etməsi və genişlənməsi bu sektoru sosial-iqtisadi tərəqqidə aparıcı sahəyə çevirib. Bu özünü yeni iş yerlərinin yaradılması, turizmlə bağlı müəssisələrin və infrastrukturun qurulmasında göstərir.
Azərbaycan reallığında da ölkə iqtisadiyyatının diversifikasiyası, regionların inkişafı üçün məhz bu sektor həlledici əhəmiyyət kəsb edir
Qeyd edək ki, turizmdə Azərbaycanın rəqabət imkanları çox yüksəkdir. Təbii sərvətlərimiz, rəngarəng iqlimimiz, zəngin tarixi-mədəni irsimiz cəlbedici turizm məhsulu yaratmaq üçün mühüm zəmindir. Bununla bərabər, Azərbaycan dövləti turizm sahəsinin inkişafını iqtisadiyyatın qeyri-neft sektoru üzrə prioritet istiqamət elan edib. Son 10 il ərzində ölkədə turizmin təşviqi ilə bağlı görülən işlər, aparılan islahatlar, qəbul edilən dövlət proqramları, normativ-hüquqi bazanın təkmilləşdirilməsi bunu bir daha sübut edir. Bu tədbirlər nəticəsində Azərbaycanda turizm sənayesi yeni mərhələyə qədəm qoyub, ölkəmiz dünyada yeni turizm istiqaməti kimi tanınmağa başlayıb, beynəlxalq turizm bazarına inteqrasiya ilbəil daha geniş şəkildə təmin olunur.
Danılmaz faktdır ki, son illər istirahət üçün Azərbaycana üz tutan turistlərin sayı ildən-ilə artır. Turist artımını tək paytaxt ərazisində deyil, eyni zamanda bölgələrimizdə də müşahidə etmək olur.
Açıqlanan statistik rəqəmlərə əsasən, 2017-ci ilin yanvar-iyun ayları ərzində dünyanın 139 ölkəsindən 1203,7 min əcnəbi və vətəndaşlığı olmayan şəxs Azərbaycana gəlib ki, bu da ötən ilin eyni dövrü ilə müqayisədə 24,5 faiz çoxdur.Dövlət Statistika Komitəsinin yaydığı məlumatda qeyd olunur ki, gələnlərin 31,2 faizi Rusiya Federasiyası, 21,2 faizi Gürcüstan, 15,0 faizi İran, 11,6 faizi Türkiyə, 3,7 faizi Birləşmiş Ərəb Əmirlikləri, 2,3 faizi Ukrayna, 14,9 faizi digər ölkələrin vətəndaşları, 0,1 faizi isə vətəndaşlığı olmayan şəxslər olub.
Ümumiyyətlə, ötən ilin analoji dövrü ilə müqayisədə ölkəyə gələn turistlərin sayı 24,5 faiz çoxdur.
"Kral Travel" turizm şirkətinin baş direktoru Rövşən Tağıyev "Bakı-Xəbər"ə açıqlamasında qeyd etdi ki, Azərbaycan turizmi artıq inkişaf dövrünü yaşayır: "Ölkəmizə gələn turistlərin sayı günü-gündən artır. Turist sayının artması turizm sektorunun inkişafına səbəb olur. Bu da ölkəmiz üçün böyük əhəmiyyət kəsb edir. Ölkəmizdə keçirilən beynəlxalq əhəmiyyətli yarışlar, tədbirlər Azərbaycanın dünyada tanıdılmasında böyük rol oynayıb. Bu il ölkəmizdə keçirilən "Bakı-2017" İslam Həmrəyliyi Oyunları və "Formula-1" Azərbaycan Qran-prisi, "Jara" festivalı və digər beynəlxalq əhəmiyyətli tədbirlərin keçirilməsi əcnəbilərin Azərbaycan haqqında məlumatlı olmasına səbəb oldu. Həmçinin, viza sisteminin sadələşdirilməsi turist sayına təsir edir".
Həmsöhbətimizin sözlərinə görə, bu gün ölkəyə gələn turistlər arasında tək ərəb ölkələrinin vətəndaşları deyil, eyni zamanda, Rusiya və digər ölkələrin vətəndaşları üstünlük təşkil edir.
R.Tağıyev onu da əlavə etdi ki, qarşıdakı illər ərzində ölkəyə gələcək turistlərin sayı daha da artacaq: "Biz bunu yaxın illər ərzində müşahidə edəcəyik. Onu da nəzərə almaq lazımdır ki, Azərbaycan turizm potensialı baxımından ən əlverişli ölkələrdən biridir. Turistlərin yararlanacağı xidmət sahələri bizim ölkədə yetərincədir. Həmçinin, müalicəvi turların üstünlük təşkil etməsi turistlərin diqqətini cəlb edir. Azərbaycanın sakit mühiti, rahat şərait istənilən xarici ölkə vətəndaşının diqqətini cəlb edir.
Həmçinin, qiymətlərin digər ölkələrlə müqayisədə münasib olması turistlər üçün daha əlverişlidir".
