Azərbaycanda 2 minə yaxın məscid fəaliyyət göstərir
Bütün Xəbərlər
13:21 24.12.2011
1857
Azərbaycan xalqı öz dini və tarixi ənənələrinə çox sadiqdir. Bunu Bakıdakı Əjdərbəy məscidinin əsaslı təmir və yenidənqurmadan sonra açılış mərasimində çıxış edən Azərbaycan Prezidenti İlham Əliyev deyib. Dövlət başçısı qeyd edib ki, dinimiz, tariximiz, milli mənəvi dəyərlərimiz bizim üçün müstəsna əhəmiyyət kəsb edir. “Son illər ərzində bizim tarixi, dini abidələrimiz təmir edilir, yenidən qurulur. Bizim üçün çox böyük əhəmiyyət daşıyan ziyarətgahlar, ibadət yerləri dövlət tərəfindən qorunur, təmir edilir”. Prezident bildirib ki, Azərbaycanda 2 minə yaxın məscid fəaliyyət göstərir. “Təkcə son 8 il ərzində Azərbaycanda 117 məscid tikilib. Onların bir hissəsi dövlət, bir hissəsi dini icmalar, bir hissəsi isə Heydər Əliyev Fondu tərəfindən tikilmiş və təmir edilmişdir. Yəni, bu, özlüyündə onu göstərir ki, bu, bizim ümumxalq işimizdir. Biz hesab edirik ki, bu sahədə işlər daha da sürətlə aparılmalıdır. Azərbaycanda din, vicdan azadlığı tam şəkildə təmin edilib”. İlham Əliyev vurğulayıb ki, biz müqəddəs dinimizə - İslam dinimizə sadiq olan xalqıq.
