Azərbaycanda şəhər mühitinin daha planlı, dayanıqlı və estetik əsaslarla inkişaf etdirilməsi məqsədilə 2026-cı il ölkə üzrə "Şəhərsalma və Memarlıq İli” elan edilib. Müvafiq qərar şəhərsalma sahəsində müasir yanaşmaların tətbiqi, tarixi-memarlıq irsinin qorunması və yeni urbanistik layihələrin təşviqi baxımından mühüm əhəmiyyət daşıyır. İl çərçivəsində paytaxt və regionlarda bir sıra layihə, tədbir və islahatların həyata keçirilməsi nəzərdə tutulur.
Milli Məclisin deputatı Tənzilə Rüstəmxanlı AZXEBER.COM-a açıqlamasında bildirib ki, şəhərsalma və memarlıq dövlətin inkişaf səviyyəsinin, idarəetmə keyfiyyətinin və vətəndaşa münasibətinin göstəricisidir:
"Bu sərəncam ölkənin yalnız iqtisadi və sosial tərəqqisini deyil, estetik zövqünü, mədəni yaddaşını və gələcək nəsillər üçün formalaşdırılan yaşayış fəlsəfəsini əhatə edir. Azərbaycan şəhərləri bu ildən sonra təkcə yaşayış məkanı deyil, milli düşüncənin, müasir dövlətçilik baxışının və mədəni özünüdərkin simvolu kimi daha aydın şəkildə görünəcək. Şəhərsalma və memarlıq dövlətin inkişaf səviyyəsinin, idarəetmə keyfiyyətinin və vətəndaşa münasibətinin göstəricisidir. Prezident İlham Əliyevin 2026-cı ili Şəhərsalma və Memarlıq İli elan etməsi Azərbaycanın uzunmüddətli inkişaf strategiyasının məntiqi davamı, güclü dövlət və inkişaf etmiş cəmiyyət quruculuğunun mühüm mərhələsidir”.
Parlamentari vurğulayıb ki, 2026-cı ilin "Şəhərsalma və Memarlıq İli” elan edilməsi Azərbaycan üçün keçmişlə gələcək arasında strateji körpü rolunu oynayacaq:
"2026-cı ilin "Şəhərsalma və Memarlıq İli” elan edilməsi Azərbaycan üçün keçmişlə gələcək arasında strateji körpü rolunu oynayacaq. "Şəhərsalma və Memarlıq İli” çərçivəsində həyata keçiriləcək təşəbbüslər tarixi irsin qorunması ilə yanaşı, müasir, dayanıqlı və insan mərkəzli şəhər modelinin formalaşmasına xidmət edəcək. Bununla da Azərbaycan şəhərləri yalnız yaşayış məkanı deyil, milli kimliyin, mədəniyyətin və innovasiyanın daşıyıcısı kimi inkişaf yolunu davam etdirəcək”.
İnşaat məsələləri üzrə ekspert, memar Muxtar Ərturan isə qeyd edib ki, gündən-günə inkişaf edən və çiçəklənən Azərbaycanda belə tədbirlərin keçirilməsi çox müsbətdir:
"Gündən-günə inkişaf edən və çiçəklənən Azərbaycanda belə tədbirlərin keçirilməsi çox müsbətdir. Azərbaycanın ən dilbər guşələrindən olan Qarabağda yenidənqurma işləri aparılır, Bakıda isə şəhərsalma istiqamətində bir sıra layihələr həyata keçirilir. Ölkədə infrastruktur və yaşıl enerji layihələrinə böyük önəm verilir.
2026-cı ildə Azərbaycanda şəhərsalma və memarlıq sahəsində daha çox irəliləyişlər gözlənilir. Müasir memarlığın inkişafı istiqamətində bir sıra tədbirlər artıq görülüb”.
Memar bildirib ki, bununla yanaşı, bəzi neqativ hallar da mövcuddur:
"Ölkənin bəzi bölgələrində infrastruktur və yaşıllaşdırma Bakıya nisbətən zəifdir. Ötən illərdə bəzi bölgələrdə binaların salınması ilə bağlı neqativ hallar müşahidə olunub. Lakin 2026-cı ildə bütün bu problemlərin həll olunacağı gözlənilir. Şəhərsalma və infrastruktur sahəsində güclü islahatlar aparılacaq, yolların infrastrukturu yaxşılaşdırılacaq.
Ümidvarıq ki, gələcəkdə belə layihələr daha da inkişaf edəcək və insanların sağlamlığına xidmət edən infrastruktur və yaşıllaşdırma layihələrinin sayı artacaq”.
Ekspert vurğulayıb ki, müasir memarlığın inkişafı istiqamətində artıq müəyyən addımlar atılıb:
"Müasir memarlığın inkişafı istiqamətində artıq müəyyən addımlar atılıb. Məsələn, "Üç Alov” Qüllələri, Crescent Mall, Sea Breeze və Port Baku kimi layihələri nümunə göstərmək olar. Gələcək illərdə Azərbaycan memarlıq nümunəsi kimi digər dövlətlərin ölkəmizdə tədbirlər keçirməsinə də ev sahibliyi edəcək”.
Şahanə Ziyad
Yazı Medianın İnkişafı Agentliyinin "regionlarin sosial-iqtisadi inkişafının təşviq edilməsi" mövzusunda dərc edilib.
