Bakıda 5 yaşlı qızın ürəyinə iynə batıb.
AZXEBER.COM Medicina.az-a istinadən xəbər verir ki, hadisə uşaq öz dostları ilə oynayarkən baş verib. Belə ki, uşaqlardan birinin əlindəki şprits qızın ürək nahiyəsinə batıb. Şpritsin plastmas tərəfi qırılıb və iynə körpənin daxilinə doğru nüfuz etməyə başlayıb.
Elmi-Tədqiqat Pediatriya İnstitutuna gətirilən uşağı cərrah Gündüz Ağayev müayinə edib. 5 yaşlı qızın ürəyində sağ mədəciyin divarında ürəklə birgə pulsasiya edən iynə aşkar olunub və ürəyin yad cismi diaqnozu qoyulub.
G. Ağayevin sözlərinə görə, əməliyyatdan öncə müəyyən edilib ki, iynə ürəyi 2 mm zədələyib və artıq qanama başlayıb.
Əməliyyat zamanı iynə ucundan sıxılaraq, miokarddan çıxarılıb. Ürəyə və yaraya tikişlər qoyulub. Xəstə 5 gün sonra evə yazılıb.
Həkimin dediyinə görə, xəstə 1 saat da əməliyyata gec alınsaydı, həyatını itirə bilərdi.
