Azərbaycandakı banklarda dolların satışına limit aradan qaldırılıb. Valyutadəyişmə məntəqələrində verilən məlumata görə onların kifayət qədər valyuta ehtiyatı var və istənilən məbləği dəyişə bilərlər.
Bank sahəsi üzrə ekspert Cavid Kərimov bununla bağlı ANS PRESS-ə verdiyi açıqlamasında qeyd edib ki, kommersiya banklarının dollar satışı limitindəki fərq onların dollar ehtiyatından asılıdır. "Azərbaycanda 44 kommersiya bankı var. Ola bilsin ki, Mərkəzi Bank həmin bankları dollarla təmin edərkən onların bəzilərinə daha az dollar düşüb. Buna görə də həmin banklar digərləri kimi limitsiz və ya 4-5 min dollar həcmində manatı dəyişməyiblər. Bu banklar limiti azaldaraq təxminən 2 min dollar həcmində pul dəyişirlər.
Mərkəzi Bankın mətbuat xidmətinin rəhbəri Namiq Əliyev bununla bağlı ANS PRESS-ə verdiyi açıqlamasında bildirib ki, bu limiti bankların özləri müəyyənləşdirir. Mərkəzi Bank bununla bağlı banklara heç bir məhdudiyyət qoymayıb.
