Ölkə kubokunun yarımfinalı çərçivəsində baş tutmuş “Xəzər Lənkəran” – “Bakı” matçı ətrafında sular durulmaq bilmir.

AZXEBER.COM-un Apasport.az saytına istinadən məlumatına görə, lənkəranlıların 2:0 hesabı ilə qalib gəldiyi görüşdə baş hakim Elçin Məmmədovun rüşvət alması iddiası yenidən gündəmə gəlib.

“Bakı”nın vitse-prezidenti Zeynal Məmmədovun PFL prezidenti Ramin Musayevə laynsman vasitəsilə 20 min dollar göndərilməsini bildirməsi və həmin yan xətt hakiminin də bunu etiraf etməsi ortada rüşvət qalmaqalının olması faktını sübuta yetirib. “Futbol+” qəzetinin yazdığına görə, məsələdən agah olan “Bakı”nın prezidenti Hafiz Məmmədov qardaşı vasitəsilə Musayevə futzal referisinin hakimlikdən uzaqlaşdırılmasını tələb edib. Sübut istəyən Ramin Musayev aşkarlanan faktdan sonra Məmmədovu müdafiə etmək niyyətindən əl çəkib və “Bakı” rəsmisinə referinin idarəçilikdən uzaqlaşdırılacağına söz verib. Bu məsələ ilə bağlı Elçin Məmmədovun fikrini də öyrənməyə çalışdıq. O, hakimlikdən uzaqlaşdırılmasından xəbərsiz olduğunu bildirdi: “Mənim bu haqda xəbərim yoxdur. Düzdür, ötən tur təyinat almadım. Ancaq bu, o demək deyil ki, cəzalandırılmışam və ya hakimlikdən uzaqlaşdırılmışam. Ümumiyyətlə, bu barədə danışmaq istəmirəm” Apasport.az saytının digər mənbədən əldə etdiyi xəbərə görə, Elçin Məmmədov hakimlikdən kənarlaşdırılıb və yalnız qərarın rəsmiləşməsi qalıb ki, bu da yaxın günlərdə reallaşacaq.