Mərkəzi Klinik Xəstəxanadan gün.az-a verilən xəbərə görə, əməliyyat xəstəxananın həkimi Kamran Musayev tərəfindən 44 yaşlı Balakən sakini İbrahim Mansurovun üzərində aparılıb.
Klinikanın Ürək Mərkəzində bu sahədə ixtisaslaşmış kardioloqlar tərəfindən hərtərəfli müayinələrdən keçirilən xəstəyə “uzunmüddətli süni ürək cihazının taxılması” məsləhət görülüb və əməliyyat müvəffəqiyyətlə yerinə yetirilib.
Əməliyyatdan sonra, K.Musayev bildirib ki, xəstəyə ABŞ istehsalı olan “HeartMate 2” süni ürək cihazı implantasiya edilib: “İmplantasiyadan xəstənin uzunmüddətli istifadəsi nəzərdə tutulub. Əməliyyatın sonrakı gedişatı isə tam normal aparılıb”. Xəstə İbrahim Mansurov isə jurnalistlərə əməliyyatdan sonra özünü yaxşı hissi etdiyini və ağrılarının azaldığını bildirib. Xəstə əvvəllər ürək ağrılarından çox əziyyət çəkdiyini, nəfəs almasında ciddi problemləri olduğunu, əməliyyatdan sonra bütün narahatlıqlarının geridə qaldığını deyib. O, əməliyyatı uğurla həyata keçirən şəxslərə minnətdarlığını bildirib.
