Xəbər verdiyimiz kimi, Azərbaycanda siqaretin aksiz dərəcəsi artırılıb.
Belə ki, artıq 1000 ədəd siqaret üçün aksiz dərəcəsi 46 manatdan 53 manata qaldırıldı.
Bu isə kəskin artım deməkdir.
Bundan əlavə, spirtli içkilərinin qiymətinin artması da gözlənilir.
Bəs, qiymətlərin anidən dəyişməsi nəyə səbəb olacaq?
Məsələ ilə bağlı iqtisadçı ekspert Natiq Cəfərli AZXEBER.COM-a açıqlama verib.
Ekspert bildirib ki, Azərbaycanda artıq beşinci dəfədir ki, aksiz vergisi tütün və spirtli içki məmulatlarında artırılır:
"Təbii ki, istənilən vergi növündə artım olarsa, bu son məhsulun qiymətinə də təsir göstərir. Artıq bu artım Azərbaycanda ilk dəfə deyil ki, baş verir. Son illər ard-arda beşinci dəfədir ki, aksiz vergisi tütün məhsullarında, spirtli içkilərdə artırılır. Dəyişiklik sosial məsələ olmadığı üçün, vətəndaşlara ciddi təsir etmədiyinə görə, bu addım çox rahatlıqla atılır. Yəni, buna görə hansısa bir etiraza səbəb olmayacağı düşünülür.
İqtisadçı əlavə edib ki, daha kəskin qiymət artımı baş verərsə, bu artıq saxta məhsulların ölkəyə gətirilməsinə şərait yarada bilər:
"Əgər qonşu ölkələrə nisbətən tütün məmulatlarının, spirtli içkilərin qiymətlərində daha kəskin artım olacaqsa, kontrafakt məhsulların, aksiz vergisi olmayan və qaçaqmalçılıq yoluyla ölkəyə gətirilən tütün və spirtli içki məmulatlarının artmasına səbəb ola bilər. Buna da xüsusi diqqət etmək lazımdır".
Mikayıl Mirzəzadə
