Son bir ayda Azərbaycanda unun qiyməti bahalaşıb.
Topdan satış mərkəzlərində satılan 50 kiloqramlıq un kisəsinin qiymətində 1 manata yaxın artım olub.
Bəs ərzaq məhsullarının, bilavasitə unun qiymətinin artması məqbuldur?
Və bu artım digər un məmulatlarının qiymətinə təsir edə bilərmi?
Məsələ ilə bağlı AZXEBER.COM-a danışan iqtisadçı ekspert Natiq Cəfərli bildirib ki, sözügedən artım ötən il də müşahidə olunub:
"Ötən ilin yay aylarında dünya bazarlarında taxılın qiyməti bir az ucuzlaşdığı üçün Azərbaycanda unun qiymətində cüzi ucuzlaşma müşahidə olunurdu. Yəqin ki, artıq bu ucuzlaşmadan sonra qiymətlərin yenidən köhnə vəziyyətə qayıtmasının şahidi oluruq. Çünki son vaxtlar dünya birjalarında taxılın qiymətində də müəyyən artım var. Bizim istehsalçılar da bu artımdan istifadə edirlər. Yəni, dünyada qiymətlər artan kimi Azərbaycanda da qiymətlərdə dəyişiklik olur. Amma bunun daha köklü səbəbi odur ki, biz ölkə olaraq ərzaq buğdası ilə özümüzü cəmi 25 faiz təmin edə bilirik. Yerdə qalan 75 faizi xaricdən alırıq.
Ekspert qeyd edib ki, xaricdə hər hansı qiymət artımı Azərbaycana birbaşa təsir edir:
"Xaricdə hər hansı qiymət fərqi olan kimi bu birbaşa bizim daxili bazara təsir edir. Bu, strateji məhsul olan çörəyin və digər un məmulatlarının qiymətinə təsirsiz ötüşmür. İndi qiymətlərin yeni artım tempinin şahidi oluruq. Ola bilər ki, çörəyin və un məmulatlarının qiymətlərinin dəyişməsi gələcəkdə artsın. Ancaq istənilən halda, əgər unun qiyməti artırsa, 2-3 həftədən sonra pərakəndə satışda başqa un məmulatlarının qiymətinin artmasının şahidi ola bilərik. Bizdə çörəklə bağlı həmişə maraqlı tendensiya var. Çox zaman bu məhsulun qiyməti dəyişmir, yalnız çəkisi azalır. Çəkinin azalması hesabına qiyməti artırırlar".
Mikayıl Mirzəzadə
