“Bildiyiniz kimi, Misirdə dəyişikliklər baş verib, amma hələ ki biz faaliyyətimizi davam etdiririk”. Bu barədə APA-ya Azərbaycanın Misirdəki səfiri Şahin Abdullayev bildirib.
Onun sözlərinə görə, Misirdə vəziyyət hələ o həddə çatmayıb ki, səfirlik öz fəaliyyətini dayandırsın: “Baş verən toqquşmalar zamanı Azərbaycan vətəndaşları arasında xəsarət alan və itkin düşənlər yoxdur. Hamıya deyilib, tapşırılıb, biz Misirdə olan hər bir azərbaycanlı ilə daimi əlaqə saxlayırıq. Ümumiyyətlə, Yaxın Şərqdə heç kəs deyə bilməz ki, iki saatdan sonra nə baş verəcək. Vəziyyətə uyğun olaraq hərəkət edirik, hələ ki işimizi davam etdiririk, ancaq diplomatların ailələri çıxarılıb”.
Xatırladaq ki, iyulun 3-də gecə Misirdə hərbi çevriliş baş verib. Ölkənin müdafiə naziri Abdel-Fəttah əl-Sisi televiziya ilə xalqa müraciətində prezident Məhəmməd Mursinin hakimiyyətdən kənarlaşdırıldığını elan edib. Misir prezidenti Məhəmməd Mursi həbs olunub. Baş verən toqquşmalar zamanı dinc əhali arasında xəsarət alanlar və ölənlər var.
