Xəbər verdiyimiz kimi, bu gün SOCAR tərəfindən ilk dəfə olaraq yerli mənşəli neft yükünün Ermənistana tədarükü həyata keçirilib. 22 vaqona yüklənmiş 1220 ton Aİ-95 markalı avtomobil yanacağı ADY-nin yük qatarı ilə Bakı Yük Stansiyasından Böyük Kəsik stansiyası istiqamətində yola salınıb. Yük oradan Gürcüstan vasitəsilə Ermənistana çatdırılıb.
Azərbaycan neft məhsullarının Ermənistana ixracı sülh prosesinin iqtisadi dividendləri konsepsiyasını əks etdirir, iki ölkə arasında iqtisadi-ticarət əlaqələrinin yaradılması istiqamətdə mühüm addımdır.
Milli Məclisin deputatı Azər Badamov AZXEBER.COM-a açıqlamasında bildirib ki, Azərbaycanla Ermənistan arasında paraflanmış sülh gündəliyi hər gün bir addım daha irəliləyir:
"Azərbaycanla Ermənistan arasında paraflanmış sülh gündəliyi hər gün bir addım da irəliləyir. Bu baxımdan Azərbaycan nefti və neft məhsullarının Ermənistana ixracına başlanması iki ölkə arasında etimad mühitinin möhkəmlənməsinə və sülhə gedən yolun sürətlənməsinə töhfə verəcək. Qəbələdə baş nazirlərin birinci müavinləri səviyyəsində keçirilən görüşdən sonra Ermənistanın baş nazirinin müavini Mqer Qriqoryan Azərbaycandan 22 vaqon benzin alınacağı barədə məlumat vermişdi. Bu gün isə həmin razılaşmanın icrasına başlanılıb”.
Parlamentari qeyd edib ki, Gürcüstan ilkin mərhələdə neft və neft məhsullarının tranziti üçün rüsumlar tutulmayacaq:
"Hazırda iki ölkə arasında sülh müqaviləsi imzalanmadığından birbaşa ikitərəfli əlaqələrin qurulması mümkün deyil. Bu səbəbdən neft və neft məhsullarının Ermənistana ixracı Gürcüstan ərazisi üzərindən həyata keçirilir. Gürcüstanın baş naziri İrakli Kobaxidzenin açıqlamasına görə, Azərbaycandan Ermənistana ixrac olunacaq neft və neft məhsullarının ilkin partiyasından tranzit rüsumları tutulmayacaq. Gələcək mərhələdə isə Gürcüstan tranzit ölkə kimi rüsumlar tətbiq etməklə neft və neft məhsullarının daşınmasını həyata keçirəcək”.
Deputat deyib ki, hazırkı ixrac kommersiya xarakteri daşıyır:
"Azərbaycanla Ermənistan arasında sülh müqaviləsi imzalandıqdan sonra ixracın tranzit ölkə üzərindən həyata keçirilməsinə ehtiyac qalmayacaq. İki ölkə arasında kommunikasiyalar açılacaq, dəmir yolu xətləri birləşdiriləcək. Bu isə neft və neft məhsullarının Ermənistana tranzit rüsumları olmadan, daha optimal qiymətlə ixracına imkan yaradacaq. Hazırkı ixrac kommersiya layihəsidir. Gələcəkdə isə iki ölkə arasında iqtisadi münasibətlər formalaşdıqdan sonra əməkdaşlıq yeni mərhələdə davam etdiriləcək”.
Şahanə Ziyad
