İrəvanda keçirilən Avronest Parlament Assambleyasının komitə iclaslarında iştirak edən azərbaycanlı deputat Tahir Mirkişili erməni deputatlara Qarabağda törədilmiş vəhşiliklərin miqyası barədə dərs verib.
AZXEBER.COM xəbər verir ki, o, Qarabağda ermənilər tərəfindən dağıdılmış evini xatırladaraq bildirib:
"Ötən il evimi ziyarət etdim. Əgər siz orada nə baş verdiyini, evimin hansı vəziyyətdə olduğunu görsəydiniz, hər şeyin necə kədərli olduğunu anlayardınız. Bura Qafqazın Xirosimasıdır. Sizin əsgərlərinizin mənim vətənimdə nələr törətdiyini görərdiniz”.
Tahir Mirkişili Ermənistanı Azərbaycanın ərazi bütövlüyünə hörmətlə yanaşmağa çağırıb: "Əgər ermənilər revanşist fikirlərə düşsələr, güclü Azərbaycan dövləti o qüvvələrə həm bu gün, həm də gələcəkdə lazımi cavab verməyə hazır olacaq".
Azərbaycanlı deputat Ağdamın "Qafqazın Xirosima”sı adlandırıldığını diqqətə çatdırıb.
İkinci Qarabağ müharibəsində hər iki tərəfdən insan itkilərinə toxunan Tahir Mirkişili qeyd edib ki, Azərbaycan hər hansı revanşist cəhdlər görmək istəmir: "Bu münaqişə gələcək deyil, artıq keçmişdir. Biz gələcəkdə nələr istəyirik, bu barədə danışaq. Sülh müqaviləsinə nail olunması xalqlarımız, regionun inkişafı üçün çox yaxşı şans olardı”.
