Xəbər verildiyi kimi ötən həftə Rusiya İstintaq Komitəsi əslən Azərbaycanın Quba rayonundakı məşhur Qırmızı qəsəbədən olan biznesmen, Moskvanın daşınmaz əmlak krallarından biri olan Solomon Manaşirovun evində və ofisində axtarışların aparıldığını açıqlayıb.
Qaynarinfo.az virtualaz.org-a istinadən xəbər verir ki, axtarışlar Manaşirova qarşı qaldırılmış cinayət işi çərçivəsində aparılıb. Biznesmen iri məbləğdə vergidən yayınmaqda ittiham olunur. Lakin onu həbs etmək mümkün olmayıb. Məlumatlara görə Solomon Manaşirov hazırda Rusiyada deyil, İsraildədir.
Solomon Manaşirovun qardaşı Roman Manaşirov ötən ilin payızında istintaqa rüşvət verdiyinə görə həbs edilib. O, vyetnamlıları qul kimi işlətməkdə ittiham edilərək həbs olunan Januko Rafalovu həbsdən çıxarmaq üçün rüşvət vermişdi. Januko Rafailov da Qırmızı qəsəbədəndir, Telman İsmaylovun keçmiş ortağıdır, habelə Manaşirovla yaxın münasibətlərə malikdir.
Rusiya KİV-ləri xəbər verir ki, Solomon Manaşirova qarşı irəli sürülən ittihamda 500 milyon rubl vergidən yayınmadan bəhs olunur. Bundan əvvəl 100 milyon rubldan söhbət gedirdi. Roman və Solomonun adı geniş publikaya o qədər də məlum deyil. Onlar elit ziyafətlərdə gözə dəyməyib, mətbuat səhifələrində görünməyiblər. Bununla belə məlumdur ki, Manaşirov qardaşları Moskvanın “Praqa” metro stansiyası yaxınlığındakı “Columbus” ticarət mərkəzinin sahibidir. Bu ticarət mərkəzi ötən il istifadəyə verilib. Manaşirovların cəmi 20-dən çox kommersiya təyinatlı daşınmaz əmlakı var. Məlumdur ki, Solomon Moskvadakı dağ yəhudiləri icmasının nüfuzlu liderlərindən biridir. “Forbes” jurnalının rus versiyası Manaşirov qardaşlarını daşınmaz əmlak kralları siyahısında 24-cü yerdə qərarlaşdırıb.
Lakin belə məlumatlar var ki, əslində Manaşirov qardaşlarının sıradan çıxarılmasının səbəbi onların bizneslərini əllərindən almaq məqsədi güdür. Rusiya biznes mediasının yazdığına görə “Columbus” ticarət mərkəzinin satışa çıxarıldığı haqda xəbərlər var. Solomon Manaşirovun həbsi də məhz ticarət mərkəzinin satışı ilə bağlı xəbərlər fonunda baş verir. Ekspertlərə görə, bu iki məsələnin arasında əlaqə var. Görünür kimlərsə Manaşirov qardaşlarının əmlakını ucuz qiymətə ələ keçirmək istəyir.
KİV-lər yazırlar ki, sahibləri “Columbus” ticrət mərkəzinə 500 milyon dollar qiymət qoyublar. Obyektin bazar dəyəri isə təxminən 400 milyon dollardır. Obyekti almağa “Morgan Stanley” bankı maraq göstərir. Lakin “Kommersant” xəbər verir ki, “Columbus”u almaq istəyən başqaları da var. Bunlar Qırmızı qəsəbədən olan digər yəhudi oliqarxlar-Qod Nisanov və Zarah İliyev, habelə onların ayrılmaz ortaqları, prezident Putinin tələbəlik dostu İlham Rəhimovdur.
Nisanov, İliyev və Rəhimov da Moskvanın daşınmaz əmlak kralları siyahısındadır, onların çoxsaylı obyektləri var. Bura ticarət mərkəzləri, otel, bazarlar və digərləri daxildir.
İstisna edilmir ki, bu “üçlük” Kremldəki güclü əlaqələri sayəsində Manaşirov qardaşlarının obyektlərini ucuz qiymətə ələ keçirməyə çalışır.
