Azərbaycanda ən böyük qida məhsulları istehsalsalçılarından biri olan "Azərsun Holdinq" bir neçə əsas ərzaq məhsullarının qiymətlərini aşağı saldığı haqda məlumat yayıb.
Şirkətin sözcüsü mətbuata açıqlamasında bildirib ki, bəzi məhsulların qiyməti 6 qəpik, 15 qəpik və 25 qəpik aralığında azalıb.
AZXEBER.COM xəbər verir ki, "Ölkə.Az" saytı bu haqda araşdırma edərək maraqlı nəticə əldə edib. Belə ki, əvvəllər tomat pastası bankaları 720 ml. idi, sonra saldılar 680 ml., indi isə 620 ml. edilib. Buradan isə bu nəticəyə gəlmək olur ki, satılan məhsulların qiyməti ilə yanaşı çəkisi də azalıb.
Ölkənin ən böyük şirkətlərindən birinin istehsal etdiyi məhsulların keyfiyyəti dəfələrlə müzakirə mövzusu olsa da, şirkətin çəki ilə müqayisəli siyasəti sosial şəbəkədə də müzakirəyə səbəb olub.
Burada isə vacib olan holdinqin istehlakçıları aldadıb-aldatmadığı barədə yaranan sualdır.
Şəmkirdə mağazası olan sahibkar isə iddia edib ki, "Azərsun" heç bir məhsulun qiymətini endirməyib. O, bu barədə "Azərsun" rəsmisinin sosial şəbəkədə endirim barədə verdiyi məlumata şərh yazıb:
"Mən Şəmkirdə mağaza işlədirəm. Bu gün "Azərsun"a mal sifariş vermişəm və qiymətlərin aşağı düşüb-düşmədiyini soruşmuşam. Qiymətlər düşməyib!"
