"Azərbaycan dövləti hər vətəndaşının sağlamlığını düşünür”.
Bu sözləri AZXEBER.COM-a açıqlamasında politoloq, keçmiş millət vəkili Yusif Bağırzadə bildirib.
O, yeni növ koronavirus (COVID-19) infeksiyası ilə bağlı Azərbaycandakı mövcud sanitar-epidemioloji vəziyyət, digər dövlətlərdə tətbiq olunan preventiv tədbirlər, eləcə də Ümumdünya Səhiyyə Təşkilatının tövsiyələri təhlil edilərək xüsusi karantin rejiminin müddətinin 31 may 2020-ci ilə qədər uzadılmasının vətəndaşların sağlamlığının qorunması üçün yüksək qiymətləndirib:
"Azərbaycan dövləti pandemiya dönəmində örnək addımlara imza atdı. Cənab prezident çıxışlarında bir məsələni xüsusi olaraq vurğuladı ki, pandemiyanın iqtisadiyyata vurduğu zərərlərdən çox, Azərbaycan dövləti vətəndaşının sağlamlığını düşünür. Bu istiqamətdə atılan addımlara diqqət etsək, nəticənin uğurlu olduğunu deyə bilərik. Öncə sərhədlər bağlandı, iş yerlərinin fəaliyyəti işçilərin əməkhaqqları verilmək şərti ilə dayandırıldı və bir çox karantin qaydaları tətbiq edildi.
Nəticədə Avropanın bəzi ölkələrində olduğundan fərqli olaraq virusun yayılma tempi azaldı və insanların sağlamlığı ən üst səviyyədə qorundu.
Düşünürəm ki, Azərbaycanın koronavirusla mübarizəsinə vətəndaşlarımız da öz dəstəklərini göstərməli və məsuliyyətini hiss etməlidirlər. Bu virusla mübarizədə bizim üçün çox önəmli üstünlükdür”.
Y.Bağırzadə karantin rejimi tətbiq edildiyi bir ərəfədə dövlətin sosial addımlarına kölgə salan və aztəminatlı ailələrin sovqatlarına göz tikən icra hakimiyyəti nümayəndlərinin davranışları ilə bağlı sualımıza da cavab verib.
O, sonuncu dəfə DTX-nın Biləsuvarda keçirdiyi əməliyyatı diqqətə çatdıraraq bunun bir məmur üçün utancverici olduğunu və baş verən hadisədən digər icra nümayəndələrinin də dərs çıxarmalı olduğunu dilə gətirib:
"Cənab prezident hər zaman ölkə vətəndaşının haqqını-hüququnu müdafiə edir, onun uğrunda mübarizə aparır. Bilirsiniz ki, mən özüm uzun illər dövlət strukturunda təmsil olunmuşam və icra orqanlarının fəaliyyətinə yaxından bələdəm. Son zamanlar icra strukturlarına qarşı görülən tədbirlər birbaşa korrupsiyaya qarşı başladılmış müharibədir. Nəticədə bu işdə əməyi olan hər kəs cəzalandırılır və pandemiya dönəmində aztəminatlı ailələrin ərzaq paylarına göz tikən məmurlar qanun qarşısında cavab verir. Düşünürəm ki, bu addımlar davamlı olacaq və yaxın gələcəkdə icra strukturlarında korrupsiyaya yönəlik işlərin qarşısı əminliklə alınacaq”.
Keçmiş millət vəkili, korrupsiyaya qarşı mübarizə istiqamətində Azərbaycanda görülən işlərin yüksək qiymətləndirilməli olduğunu və Kamran Əliyevin baş prokuror təyin olunmasının bu mübarizənin tərkib hissələrindən biri olduğunu dilə gətirib. O bu təyinatın prokurorluq orqanlarında yenilənmənin başlanğıcı olacağını da bildirib:
"Mən şəxsən bu təyinatı uğurlu hesab edirəm. Çünki Kamran Əliyev bundan öncə Korrupsiyaya Qarşı Mübarizə İdarəsinin strukturunu quran və bu sahədə kifayət qədər təcrübəyə sahib bir mütəxəssisdir. Ümumilikdə bu təyinat dövlətin korrupsiyaya qarşı mübarizədə daha inamla və əzmlə işlər görəcəyini göstərir. Düşünürəm ki, bu addımdan sonra prokurorluq orqanlarında yenilənmə işləri başlayacaq və bu islahatlar vətəndaşların xeyrinə dəyişəcək”.
