Bu haqda portalımıza yol polisi tərəfindən haqsızlığa məruz qalan Bakı sakini İsmayılov Vasif məlumat verib. Onun dediyinə görə, bir neçə gün öncə məhkəmə baş tutub və yol polisinin protokolu ləğv edilib. Eyni zamanda Yol Patrul Xidmətinin əməkdaşına töhmət verilib.
Xatırladaq ki, AZXEBER.COM-a müraciət edən Bakı sakini İsmayılov Vasif yol patrul xidmətinin əməkdaşının onun avtomobilini qanunsuz şəkildə cərimə meydançasını apardığını bildirmişdi.
30 mart gecə saat 03:00-da ayıq sürücü ilə evinə gələn vətəndaş yol polisinin "qurbanı" olub: "Dünən gecə içkili olduğuma görə, evə getmək üçün ayıq sürücünü çağırdım. Yolda gedərkən 99-YP-384 nömərli YPX əməkdaşı bizi saxladı, polis ayıq sürücünün içkili olmadığını görüb,bizi buraxdı. Ayıq sürücü məhəlləmizə gəlib, maşını park etdi və getdi. Elə bu anda mən siqaretimi götürməyə və şüşələri bağlamaq üçün avtomobilimə mindim. Həmin an polis mənə yaxınlaşdı və bildirdi ki, maşın cərimə meydançasına getməlidir. Mən buna etiraz etdim və bildirdim ki, bu qanunsuzdur. Hətta təklif etdim ki, kameranı açaq və baxaq. Ancaq polis razılaşmadı və evakuator çağırıb maşını apardılar".
10-DN-313 markalı "Tofaş" avtomobilin sürücüsü həmçinin onu da bildirib ki, avtomobili Nizami rayon cərimə meydançasına aparılmışdı və məhkəmənin qərarından sonra o avtomobilini cərimə meydançasından çıxarıb.
