Son illər Bakıda tıxac problemi və nəqliyyat infrastrukturunda mövcud çatışmazlıqlar mövcuddur. Bu səbəbdən də, paytaxt sakinləri və əhali əziyyət çəkir.
AZXEBER.COM xəbər verir ki, paytaxt nəqliyyatındakı problemlərin həlli üçün Bakıdakı nəqliyyat infrastrukturunda yaxın gələcəkdə yeniliklər tətbiq ediləcək.
Tətbiq ediləcək yeniliklər Azərbaycanın Yerüstü Nəqliyyat Agentliyinin (AYNA) sədri Anar Rzayev tərəfindən təqdim edilib.
Qeyd edək ki, şəhərdə hazırda 2100 avtobus fəaliyyət göstərir. Bu rəqəmin 2500-2800 arasında olması tələb olunur. Yaxın zamanda 160 elektrikli avtobusun gətirilməsi planlaşdırılır. Avtobusların sayının artırılması və müasirləşməsi həm sərnilinlərin gündəlik həyatında mühüm rol oynayacaq. Həm də, ekoloji baxımdan havanın çirklənməsinin qarşısını az da olsa almış olacaq.
Bundan əlavə, paytaxtın müxtəlif ərazilərində ictimai nəqliyyatın sürətini artırmaq və avtobusların qrafikdən çıxmasının qarşısını almaq üçün yeni avtobus xolaqları çəkilişi davam edir. Bu istiqamətdə Bakı şəhərinin Zərifə Əliyeva küçəsində yeni avtobus zolağının çəkiləcəyi bildirilib. Bu layihənin artıq hazır olduğu və avtobusların bu zolaq vasitəsilə bir saat ərzində 8000 sərnişin daşıması gözlənilir.
Eyni zamanda, "Gənclik" metrostansiyasının yanında üç yeni taksi duracağı yaradılacaq. Rzayev, duracaqların nəzərdə tutulduğu yerlərdə işlərin artıq başladığını açıqlayıb.
Bununla yanaşı, su taksisi layihəsinin effektiv olmadığı bildirilib. Rzayev, su taksisinə çəkilən xərclərin avtobus alımına nisbətən daha yüksək olduğunu vurğulayıb. Bu səbəbdən su taksisi ideyasının həyata keçirilməsinin mümkün olmadığını qeyd edib.
Bu yeniliklər, Bakıdakı nəqliyyat sisteminin inkişafını və sərnişin mobilliyinin artırılmasını hədəfləyir. Şəhərin nəqliyyat infrastrukturunda gözlənilən dəyişikliklər, sakinlərin rahatlığını təmin etmək məqsədini güdür.
