Bu gün Bakıda Azərbaycanın xarici işlər naziri Elmar Məmmədyarov və iranlı həmkarı Məhəmməd Cavad Zərif arasında görüş keçirilib.
APA-nın məlumatına görə, görüş təkbətək və geniş tərkibdə baş tutub.
Nazir Elmar Məmmədyarovİranın Azərbaycanla tarix, dil, din, mədəniyyət baxımından bağlılıqlarını qeyd edib. Görüş zamanı ikitərəfli əlaqələri daha da gücləndirməyin yolları müzakirə edilib. O, həmçinin Ermənistan-Azərbaycan münaqişəsinin nizamlama prosesini qonağın diqqətinə çatdırıb.
İranın xarici işlər naziri Məhəmməd Cavad Zərif ötən 2 il ərzində 20-yə yaxın iranlı nazirin Azərbaycana səfər etdiyini bildirib. O, münasibətləri müxtəlif sahələrdə inkişaf etdirməyin vacibliyini qeyd edib.
Görüşdən sonra nazirlər mətbuata açıqlama veriblər.
Xatırladaq ki, daha öncə iranlı nazir Azərbaycan prezidenti İlham Əliyevlə də görüşüb.
