Piyada səkilərinin və yol kənarlarının ticarət məqsədilə zəbt olunması, şəhərdə həm təhlükəsizlik baxımından, həm də rahatlıq baxımından böyük narahatlığa səbəb olur. İnsanların piyada üçün nəzərdə tutulmuş yerlərdə hərəkət edə bilməməsi, onları avtomobil yolu ilə keçməyə məcbur edir ki, bu da yol qəzalarının riskini artırır.
Bu cür köşklərin yerləşdirilməsi həm də şəhərin ictimai məkanlarının istifadəsini çətinləşdirir, şəhər mühitinin səliqəliliyini və estetik görünüşünü pozur. Bu baxımdan Bakı sakinləri narazılığını da zaman-zaman sosial şəbəkələrdə dilə gətirir.
Dünyanın bütün ölkələrində yollar və səkilər ticarət məkanı deyil, piyadaların rahat və təhlükəsiz hərəkəti üçün nəzərdə tutulur.
Eyni zamanda bəzi ticarət köşkləri həm də çox səliqəsiz və nizamsız vəziyyətdədir. Onların yerləri, quruluşu və ümumi vəziyyəti şəhərin görünüşünə xələl gətirir, küçələrin və səkilərin estetik tərtibatını pozur. Bu səliqəsizlik, həmçinin piyadaların hərəkətini daha da çətinləşdirir, ətraf mühitin çirklənməsinə səbəb olur və şəhər sakinlərinin narazılığını artırır.
Belə bir vəziyyətin davam etməsi dünyanın ən gözəl şəhərlərindən olan Bakının estetik görünüşünə ciddi zərbə vurur. Ticarət köşkləri həm təhlükəsiz, həm də estetik normalara uyğun, nizamlı şəkildə təşkil edilməli, şəhər infrastrukturu ilə uzlaşmalıdır.
