Bakıda uşaq bağçası xarabalığa çevrilib.
AZXEBER.COM xəbər verir ki, Xətai rayonu, Nəsrəddin Tusi 14 saylı küçədə yerləşən 124 saylı bağça xarabalığa çevrilib.
1998-ci ilə qədər fəaliyyət göstərən bağça indi baxımsız haldadır, ərazi "bomj" və narkomanların yuvasına çevrilib.
Həmin ərazidə olan əməkdaşımız bildirir ki, böyük bir ərazini əhatə edən bağça 3 hissədən ibarətdir. Bağçanın bir hissəsində qaçqın və məcburi köçkünlər məskunlaşıb. Mətbəx və digər hissə isə zibilliyə çevrilib.
Onu da qeyd edək ki, xarabalığa çevrilən hissədə də bir neçə il bundan öncəyə qədər qaçqın və məcburi köçkünlər məskunlaşmışdı. Əmək və Əhalinin Sosal Müdafiəsi Nazirliyinin Bakının Qaradağ rayonunda məcburi köçkünlər üçün salınmış "Qobu Park-2” yaşayış kompleksində mənzillərə yerləşdirildikdən sonra bu ərazilər boş və baxımsız halda qalıb.
Onu da xüsusi qeyd etmək lazımdır ki, bağçanın ərazisindən yol kimi istifadə edilir və bağça ilə üzbəüz yaşayış binası var. Baxımsız olan ərazidə narkoman, bomjların məskunlaşması sakinlər üçün də təhlükəli hal yaradır.
Bəs Xətai rayon İcra Hakimiyyəti bununla bağlı nə deyir?
Xətai Rayon İcra Hakimiyyətinin İctimai-siyasi və humanitar məsələlər şöbəsinin müdiri Pənah İmanov AZXEBER.COM-a açıqlamasında bağçanın uzun zamandır fəaliyyətsiz olduğunu təsdiqləyib:
"Öncə onu qeyd edim ki, bağçalar Elm və Təhsil Nazirliyinin tabeliyindədir. 124 nömrəli bağça qəzalı vəziyyətdə olduğu üçün fəaliyyətini uzun zamandır ki, dayandırıb. Bağçanın bir hissəsində hələ də qaçqın və məcburi köçkünlər məskunlaşıb. Onlar da həmin ərazidən köçürüldükdən sonra Elm və Təhsil Nazirliyi bağça ilə bağlı lazımi tədbiri görəcək".
Ərazinin zibillik olması ilə bağlı danışan Pənah bəy bunları qeyd edib: "Biz orada bir neçə dəfə təmizlik işləri görmüşük. İndi də həmin ərazi üzrə lazimi tədbir görüləcəkdir".
Elm və Təhsil Nazirliyinin İctimaiyyətlə əlaqələr sektorunun müdiri Cəsarət Valehov AZXEBER.COM-a açıqlamasında bağçaların vəziyyəti ilə bağlı monitoriq aparıldığını və lazımi addımların atılacağını bildirib:
"Biz bağçaların vəziyyəti ilə bağlı monitoriqlər aparmışıq. Yararsız vəziyyətdə olan bağçalarımız var. Təmir olunması mümkün olanı təmir etmək üçün plan hazırlayırıq. Gələcəkdə də bu işlər davam etdiriləcək.
124 saylı bağça ilə bağlı vəziyyətə baxılacaq və dəyərləndiriləcək. Ona uyğun qərar veriləcək. Həmin bağça ya yenidən qurulacaq, ya da yenidən təmir olunacaq. Bu qarşıda duran vəzifələrimizdəndir".
Həmin ərazidən fotoları təqdim edirik:
Günel Hüseynli
