Kral Salman adına Beynəlxalq Ərəb Dili Akademiyasının baş direktoru Abdulla Əl-Vaşmi Azərbaycana səfəri çərçivəsində Bakı Avrasiya Universitetinin nəzdindəki Səudiyyə Ərəbistanı Mərkəzində olub.
Mərkəzin direktoru, dosent Ülviyyə Hüseynova və Beynəlxalq Ərəb Dili Akademiyasının baş direktoru Abdulla Əl-Vaşmi AZXEBER.COM-a açıqlama verib.
Ülviyyə Hüseynova açıqlamasında universitetin 6 illik fəaliyyəti dövründə ərəb dilində öyrənmək istəyən bir çox tələbələrin tam ödənişsiz ərəbcə təhsil almalarını təmin etdiklərini bildirib:
" 6 il bundan öncə Bakı Avrasiya Universitetindəki layihəmiz əsasında Səudiyyə Ərəbistan Krallığındakı Kral Salman adına Beynəlxalq Ərəb Dili Akademiyasının köməyi ilə biz bu universitetin nəzdində ərəbşünaslıq mərkəzi yaratmağa nail olduq.
6 il ərzində biz Azərbaycanda ərəb dilində təhsil alan bir çox tələbələrə tamamilə ödənişsiz dərslər keçmişik. Bununla yanaşı Azərbaycanda hər il 20 tələbənin təhsil haqqı ödənişi bizim Səudiyyə Ərəbistanı mərkəzi tərəfindən qarşılanır. Biz həmçinin ərəb və azərbaycan dilləriondə olan kitabların nəşri ilə də məşğuluq.
Yeni layihələrimizə start vermişik. Ölkəmizdə bir çox dövlət qurumu əməkdaşlarına ərəb dilini öyrətməyə başlamışıq. Bir neçə nazirliklə danışıb razılığa gəlmişik. Onu da qeyd edim ki, hər biri ödənişsiz əsaslarla həyata keçiriləcək.
İlk dəfə bu il azərbaycanda təhsil alan ərəbşünas tələbələri biz Səudiyyə Ərəbistana təhsil almağa göndərəcəyik. O tələbələr 8 aylıq təqaüd proqramı qazanıblar və ödənişsiz əsaslarla təhsil alacaqlar. Səudiyyə Ərəbistanında 127 yer ayrılıb və ölkəmizdən 127 tələbə bakalavr, magistr dərəcələri almaq üçün göndəriləcək”.
Beynəlxalq Ərəb Dili Akademiyasının baş direktoru Abdulla Əl-Vaşmi ölkəmizdə olduğundan və mərkəzlə fəaliyyətlərinin uğurlu davam etməsindən şad olduğunu bildirib:
"Mənim üçün xoşdur ki, mən bu gün Bakı Avrasiya Universitetində Ərəbşünaslıq mərkəzində iştirak edirəm. Bu mərkəz artıq bir neçə ildir ki, fəaliyyət göstərir və Səudiyyə Ərəbistanda olan qurumlarla birgə bu qardaş ölkədə ərəb dilinin yayılmasına öz töhfəsini verir.
Qardaş ölkədə olan ərəbşünaslıq mərkəzinin nümayəndələri ilə Səudiyyə Ərəbistanda olan əməkdaşlarımız sıx əlaqəlidir.Mən Riyad şəhərindən gəlmişəm ki, bu mərkəzə baş çəkim. İkitərəfli görüşlər keçirərək ərəb dilinin hansı proqramlarla tədris olunmasını müzakirə edək. Eyni zamanda Kral Salman adına olan ərəbşünaslıq mərkəzinin 30-dan çox ölkədə təhsil, tədris proqramları var.
Ötən il müəyyən proqramları yerinə yetirmişik və müəyyən nəticələri əldə etmişik. Qarşıdakı illərdə daha yüksək nailiyyətlər əldə etməyi planlaşdırırıq.
Biz istəyirik ki, bir çox tələbənin ərəbcə təhsil alması üçün şərait yaradaq.
Ərəb dili 400-500 yaşı olan bir dil deyil. Dilimiz min illərin dilidir. Uzun tarixə malik olan salnamələr mövcuddur. Dünya müsəlmanları bu dilə hər zaman maraq göstəriblər.
Ərəb dilinə hər yerdə geniş ehtiyyac var. Buna görə də, əlavə proqramlar qurmağı planlaşdırırıq ki, ərəb dilini öyrənənlərin sayı artsın”.
Oksana Orucova
Emil Rasimli
