Balakəndə əhaliyə göstərilən rabitə xidmətinin keyfiyyətini yaxşılaşdırmaq, rabitə obyektlərində yeni texnologiyaların tətbiqi işini sürətləndirmək məqsədilə yeni layihələr həyata keçirilir.
Balakən Rayon Telekommunikasiya Qovşağından verilən məlumata əsasən, hazırda rayonda abonentlərə 9 elektron tipli ATS xidmət göstərir.Ötən il 16 kilometr məsafəyə birləşdirici optik kabel çəkilib, mərkəzi ATS-in birləşdirici xətləri tam optikləşdirilib. Görülən tədbirlər nəticəsində son bir ildə sürətli internet istifadəçilərinin sayı min abonent artaraq 1340 nəfərə çatıb. Yeni Şərif kənd ATS-də xətt şəbəkəsinin quraşdırılması başa çatıb, Katex-kombinat yaşayış məntəqəsində 128 nömrə tutumlu elektron ATS istifadəyə verilib.Bu il rayonun Qazma kəndindəki 256 nömrə tutumlu elektron ATS-də xətt şəbəkəsinin qurulması və abonentlərin genişzolaqlı internetlə təmin edilməsi, İtitala kəndində genişzolaqlı internetin istifadəyə verilməsi nəzərdə tutulur.
