‘Barəmdə bəzi mətbu orqanlar uydurma yazırlar’ - İsmayıl Ömərov

“İnanırdım ki, Fərid etimadı doğruldacaq”. "Fərid Məmmədovun ikinci yerə çıxması münasibətilə Azərbaycan xalqını təbrik edirəm. Çox sevindim. Həqiqətən də, Fərid gözəl çıxış etdi. O, birinci yerə layiq idi. Amma ikinci yer də pis deyil. Bir daha bəlli oldu ki, Azərbaycan dünya musiqisinə, incəsənətinə töhfə verir, inkişaf edir". AZXEBER.COM-un məlumatına görə, bunu Teleqraf.com-a açıqlamasında İTV-nin keçmiş baş direktoru İsmayıl Ömərov "Evrovision" Musiqi Yarışmasında Azərbaycan təmsilçisi Fərid Məmmədovun ikinci yer tutmasına münasibət olaraq bildirib. Onun sözlərinə görə, F.Məmmədovun qələbəsi İTV-nin Azərbaycandan "Evrovision"a təmsilçi seçimində yanılmadığının göstəricisidir: "Mən inanırdım ki, Fərid etimadı doğruldacaq". İ.Ömərov Azərbaycandan Rusiyanın "Evrovision"dakı təmsilçisinə göndərilən səslərin hesablanmamasına münasibət olaraq bildiridi ki, bu barədə məlumatlı deyil: "Bilmədiyim şeylərə şərh vermək istəmirəm. Hazırda istirahət edirəm. Azərbaycandayam. Barəmdə bəzi mətbu orqanlar uydurma yazırlar. Vətənini sevən insanlar həqiqəti deməli, uğurlara sevinməli, məğlubiyyətlərə isə təəsüflənməlidir. Mən də Fəridin qələbəsinə ürəkdən sevinirəm".