Biləsuvar sərhəd-keçid məntəqəsində Naxçıvana gedən avtonəqliyyat vasitələrinin keçidinə icazə verilib.
Dövlət Gömrük Komitəsinin Biləsuvar Gömrük İdarəsinin rəis müavini Mirrafiq Mirsultanovun APA-nın cənub bürosuna verdiyi məlumata görə, avtomobillərin buraxılışı yalnız Biləsuvar sərhəd-keçib məntəqəsində təmin olunub, Culfada isə məhdudiyyət qüvvədə qalıb.
M. Mirsultanov eyni zamanda əlavə edib ki, piyada olaraq sərhədi keçən vətəndaşlar üçün məhdudiyyət yoxdur.
Qeyd edək ki, noyabrın 8-də İranın Azərbaycandakı səfirliyi Biləsuvar və Culfa sərhəd-keçid məntəqələrinin bağlanması ilə bağlı bəyanat yayıb. Səfirliyinin mətbuat xidmətinin rəhbəri Məhəmməd Ayətullahinin adından yayılan bəyanatda bildirilir ki, bu addıma səbəb Azərbaycan sərhədçilərinin noyabrın 6-da Poldəşt-Şahtaxtı sərhəd-keçid məntəqəsini bağlamasıdır.
Seyid Məhəmməd Ayətullahi bildirib ki, İran iki gün gözlədikdən sonra sərhəd-keçid məntəqəsi açılmadığı üçün Azərbaycan tərəfini qabaqcadan məlumatlandıraraq, Biləsuvar və Culfa sərhəd-keçid məntəqələrini bağlayıb.
