Bakının Binəqədi rayonu, Binəqədi rayon Bələdiyyələr şurasının sədri, Binəqədi bələdiyyəsinin xanım sədri Starə Cabbarlı ilə müavini Sabir Həsənov əlbəyaxa dava edib.
AZXEBER.COM "Bizim Yol"a istinadən xəbər verir ki, bələdiyyənin adının çəkilməsini istəməyən əməkdaşının verdiyi xəbərdə davaya səbəb sədr Starə Cabbarlının Sabir Həsənovu müavin vəzifəsindən uzaqlaşdırmaq istəməsidir.
Belə ki, bələdiyyənin sədr müavini Sabir Həsənov öz kabinetində, bələdiyyənin digər üzvləri ilə vergi yığımları haqda danışırmış. Elə bu vaxt otağa daxil olan xanım sədr, müavini alçaldıcı sözlərlə təhqir edib. Bununlada kifayətlənməyən Starə Cabbarlı, Sabir Həsənovun yaxasından tutaraq onu bələdiyyədən qovduracağını bildirib. Məsələdən xəbər tutan Binəqədi Rayon İcra hakimiyyətinin başçısı Xaləddin İsgəndərov, birinci müavini İlqar Süleymanov və Binəqədi rayon YAP-ın sədri Ramiz Göyüşovu dərhal bələdiyyə göndərib. Bələdiyyəyə gələn müavin və sədr onları sakitləşdirib. Daha sonra məlum olub ki, bələdiyyə sədrinin Sabir Həsənovu vəzifəsindən uzaqlaşdırmaq istəməsinin səbəbi, vergi yığımını lazımi qədər həyata keçirə bilməməsidir. Xanım sədr vaxtilə Vegilər nazirliyində çalışan və hazırda Binəqədi bələdiyyəsinin üzvü olan Rasim Gözəlovu, Sabir Həsənovun yerinə gətirərək, vergi yığımında vəziyyəti yaxşılaşdırmaq istəyir.
Qeyd edək ki, Binəqədi bələdiyyəsinin üzvü olan Rasim Gözəlov, Vergilər nazirliyində çalışmış, işində yol verdiyi nöqsanlara görə nazir Fazil Məmmədovun əmri ilə vəzifəsindən kənarlaşdırılmışdır.
