"Bu gün tanınan bir çox bloger sosial şəbəkənin hesabına dəbdəbəli həyat yaşayan, bahalı paltar geyinən, bir qarın yemək qarşılığında restoranlarda reklam çəkən, turizm şirkətlərinin hesabına xaricə səfər edən və beşulduzlu otellərdə qalan adamlardır."
AZXEBER.COM xəbər verir ki, bu sözləri aparıcı, prodüser Tarix Əliyev sosial şəbəkə hesabında yazıb.
O, bəzi blogerləri sərt tənqid edib:
"Hərdən bir sual verməyim gəlir: bu bloggerlər kimdir? "Instagram" yaranmamışdan əvvəl onların fəaliyyəti, həyat tərzi necə olub? Çünki bu gün tanınan bir çox blogger - hamısını demirəm - sosial şəbəkənin hesabına dəbdəbəli həyat yaşayan, bahalı paltar geyinən, bir qarın yeməyi qarşılığında restoranlarda reklam çəkən, turizm şirkətlərinin hesabına xaricə səfər edən və beşulduzlu otellərdə qalan adamlardır.
Bəli, aralarında nümunəvi ailələrdən çıxan, imkanlı valideynləri olan bloger dostlarımız da var. Onların yolu aydındır. Amma bəzi qızların keçmişini araşdırsanız, barlardan, gecə klublarından çıxıb bu gün özlərini "influencer" adlandırdıqlarını görərsiniz. İctimai nüfuz qazanıblar, amma bu nüfuz nəyin əsasında formalaşıb?
Bunların heç bir peşəsi yoxdur. Əgər ciddi araşdırılsa, "bloger" adı altında çox fərqli məqsədlərin gizləndiyini görərik. Göstərdikləri "şahənşah” həyatları, bahalı villalarda çəkilən videoları, çox zaman real deyil. Bu da bəzi imkanlı şəxslərin diqqətini cəlb edir və nəticədə "influencer" adı altında, əslində cəmiyyəti çaşdıran bir proses baş verir.
Amma günah təkcə onlarda deyil. Onlara bu qədər dəyər verən, milyonlarla izləyici bağışlayan da kasıb, sadə insanlardır. Bir telefona, bir paltara, bir şampuna görə onların səhifələrini izləyən cəmiyyətin özü bu süni nüfuzun yaranmasına zəmin yaradıb".
Aysel