Bizim üçün tarixi abidənin hansı dinə mənsub olması əsas meyar deyil.
AZXEBER.COM xəbər verir ki, bu sözləri deputat Fazil Mustafa Mədəniyyət Nazirliyi və Dini Qurumlarla İş üzrə Dövlət Komitəsinin birgə təşkilatçılığı ilə "Tarixi-dini abidələrin qorunması: çağırışlar və perspektivlər” mövzusunda keçirilən mətbuat konfransı zamanı deyib.
O bildirib ki, tarixi abidələri bərpa etməklə biz yalnız Azərbaycan cəmiyyətinə və onun dəyərlərinə hörmətimizi ifadə etmirik, həm də Azərbaycanın dünyada daha yaxından tanınmasına, insanların ölkəmizə, o cümlədən bu abidələrə turistik məkan kimi marağının artmasına şərait yaradırıq. Bu, olduqca vacib məsələdir.
O qeyd edib ki, bizim üçün tarixi abidənin hansı dinə mənsub olması əsas meyar deyil. Biz bütün tarixi abidələri onların hansı dinə aid olmasından asılı olmayaraq bərpa edirik. Qarabağı işğaldan azad etdikdən sonra da bunu nümayiş etdirdik. Kilsəni də, sinaqoqu da, məscidi də eyni prinsiplər, eyni insani yanaşma, tolerantlıq və multikulturalizm anlayışı əsasında bərpa etdik. Bu yanaşma Azərbaycan dövlətinin hansı prinsipləri önə çəkdiyini göstərən əsas xarakterik xüsusiyyətlərdəndir.
Eyni zamanda, biz tarixi-dini abidələrə yalnız məkan prizmasından yanaşmırıq. Biz bu məsələni yalnız Azərbaycan ərazisində həll etmirik. Avropa məkanında da Heydər Əliyev Fondu və digər dövlət qurumları vasitəsilə tarixi-dini abidələrin bərpasına öz töhfəmizi veririk. Vatikanda da, Fransada da bu istiqamətdə müxtəlif layihələr həyata keçiririk.
Şahanə
