BMT-nin qərargahında Novruz bayramı keçirilib - FOTOLAR
09:28 20.03.2013
1105
Novruz bayramı münasibətilə Azərbaycanın BMT yanında daimi nümayəndəliyinin təşəbbüsü ilə bu qurumun qərargahında İran, Əfqanıstan, İraq, Qazaxıstan, Qırğızıstan, Özbəkistan, Pakistan, Hindistan, Tacikistan, Türkiyə və Türkmənistanın BMT yanında daimi nümayəndəlikləri ilə birlikdə tədbir keçirilib. Azərbaycanın BMT yanında daimi nümayəndəliyindən verilən məlumata görə, tədbirdə çıxış edən BMT-nin baş katibi iştirakçılara təbriklərini çatdırıb, Novruz bayramının əhəmiyyətindən danışmışıb. BMT Baş Məclisinin 67-ci sessiyası prezidentinin müavini - Əfqanıstanın BMT yanında daimi nümayəndəsi Assambleya prezidentinin müraciətini oxuyub və təbriklərini çatdırıb.Azərbaycanın BMT yanında daimi nümayəndəsi, səfir Aqşin Mehdiyev Novruz bayramının əhəmiyyətini, mədəni irsin tərkib hissəsi kimi qarşılıqlı hörmət, anlaşma və sülh idealları əsasında xalqlar arasında əlaqələrin möhkəmləndirilməsi üçün vacib rol oynadığını, mədəni və qədim adət-ənənələri əks etdirdiyini, beynəlxalq əməkdaşlığın inkişafına töhfə verdiyini və mədəniyyətlərarası dialoqu təşviq etdiyini vurğulayıb. Diplomat qeyd edib ki, Baş Məclisin 64-cü sessiyası zamanı Azərbaycanın təşəbbüsü ilə irəli sürülən “Beynəlxalq Novruz Günü” adlı qətnamə layihəsi yekdilliklə qəbul olunub və 21 mart tarixini Beynəlxalq Novruz Günü kimi tanıyıb.A.Mehdiyev üç min ildən artıq müddətdir keçirilən Novruz bayramının üç yüz milyon insan tərəfindən təntənəli şəkildə qeyd edilməsinin xalqların həmrəyliyinin təşviq olunmasına xidmət etdiyini bildirib, tədbir iştirakçılarına təbriklərini çatdırıb. Çıxışlardan sonra tədbir Azərbaycan da daxil olmaqla bir sıra ölkələrin xalq yaradıcılıq ustalarının iştirakı ilə davam edib. Tədbir çərçivəsində Novruz bayramına aid şirniyyat nümunələri təqdim olunub. //anspress
