ABŞ-ın təyyarə istehsalçısı Boeing-in səhmləri Hindistana məxsus, 200-dən çox sərnişin daşıyan Air India təyyarəsinin Hindistanın Ahmedabad şəhərində qəzaya uğramasından sonra dəyər itirməyə başlayıb.
AZXEBER.COM xarici mediaya istinadən xəbər verir ki, Şirkətin Nyu-York birjasında ticarət olunan səhmləri Hindistanın Qucarat ştatının Ahmedabad şəhərində yerləşən hava limanı yaxınlığında Air India təyyarəsinin qəzaya uğramasından sonra açılışdan əvvəlki ticarət əməliyyatlarında təxminən 8 faiz dəyər itirib. Hindistan mediasının xəbərinə görə, Ahmedabad şəhərindəki Sardar Vallabhbhai Patel Beynəlxalq Hava Limanından Böyük Britaniyanın London şəhərindəki Gatwick Hava Limanına uçan sərnişin təyyarəsi qalxışdan qısa müddət sonra qəzaya uğrayıb.
Hindistan mediası Air India-nın 171 saylı reysini həyata keçirən təyyarədəki sərnişin sayı ilə bağlı müxtəlif məlumatlar yayarkən, *India Today* xəbər verir ki, təyyarədə 230 sərnişin və 12 ekipaj üzvü olmaqla ümumilikdə 242 nəfər olub.
Digər tərəfdən, qəza ilə bağlı sərnişin sayı və ya səbəbi ilə əlaqədar hələlik rəsmi açıqlama verilməyib. Qəzaya uğrayan təyyarənin "Boeing 787-8 Dreamliner" modeli olduğu qeyd olunur.
