Azerisport.az xəbər verir ki, o, öz rəsmi saytında Çeçenistan prezidenti Ramzan Kadırovun komandasına qarşı oyun zamanı rastlaşdığı bir çox həqiqətləri bütün dünyaya açıqlayıb:

“Düzünü deyim ki, mən bu yoldaşlıq oyununa heç də pula görə getməmişdim. Bu matç mənim maliyyə vəziyyətimi qətiyyən dəyişmədi. Əksinə, San-Pauluda 2 saatlıq mühazirə oxumaqla orda aldığımdan daha çox pul qazanmış oluram. Mən sadəcə səfərdən bir neçə gün öncə öyrəndim ki, qarşılaşma Çeçenistanda keçiriləcək. Son dərəcədə qeyri-adi vəziyyətlə üz-üzə qalmışdıq. Axı mən Çeçenistan və Rusiya arasındakı müharibələrdən xəbərdar idim. Baxmayaraq ki, indi gərginlik elə də çox deyildi. Yalnız son anda başa düşdüm ki, bu qarşılaşma heç də idman baxımından yox, siyasi və populist xarakter daşıyır”.

Rai oyun ərəfəsində gördüyü digər məqamlara da xüsusi diqqət ayırıb: “Biz Qroznıya günün əvvəlində yetişdik və təmirə ehtiyacı olan bir teatra yollandıq. Bizi milli musiqi və rəqslər gözləyirdi. Hamı bizimlə mehriban və gülərüz davranırdı. Onda mənə elə gəldi ki, yerli əhali özünü çox yaxşı hiss edir. Yeri gəlmişkən, onların əksəri qadınlar idi. Çoxları mobil telefonları ilə çəkirdilər. Ancaq bütövlükdə Çeçenistanda əsl müharibə atmosferi var. Küçələrdə çox az adama rast gəlmək olur. Bütün bunlar mənə qəribə görünürdü. Yalnız sonradan bildim ki, müharibə zamanı şəhərin 98 faizi dağıdılıb”.

“Məndən xahiş edirdilər ki, tam gücümlə oynamayım. Guya matç əyləncə xarakteri daşıyır. Onların heyətində hətta Qullit, Matteus kimi keçmiş futbolçular yer alsa da, yenə bizimlə bərabərsəviyyəli oyun göstərə bilmirdilər. Qarşılaşmada yeganə kənar adam Çeçenistan prezidenti idi ki, heç vaxt peşəkar futbolla məşğul olmamışdı. Mən ora getməklə ağılsızlıq etdim. Ancaq istənilən halda böyük dərs aldım. Ən azı Rusiya və Çeçenistan arasındakı siyasi proseslərdən az-çox xəbərdar oldum”.