Bu gün, iyunun 5-i, Azərbaycan ədəbiyyatının görkəmli nümayəndəsi, dərin lirizmi və vətənpərvərliyi ilə seçilən şair Mikayıl Müşfiqin anadan olduğu gündür.
AZXEBER.COM xəbər verir ki, Mikayıl Müşfiq 1908-ci ildə Bakıda ziyalı ailəsində dünyaya göz açıb, hələ gənc yaşlarında poeziyaya maraq göstərib.
O, XX əsr Azərbaycan poeziyasının ən zərif lirizm nümayəndələrindən biri sayılır. Şairin yaradıcılığında vətənə sevgi, azadlıq idealları, təbiət gözəllikləri və insan duyğularının poetik ifadəsi xüsusi yer tutur.
"Oxu, tar!”, "Yenə o bağ olaydı”, "Ana”, "Azərbaycan” kimi məşhur şeirləri Müşfiqin poeziyada özünəməxsus yol tutduğunu təsdiqləyir. Onun şeirləri musiqiyə çevrilmiş, xalqın dilində nəğməyə dönmüşdür.
1937-ci ilin repressiyaları zamanı Mikayıl Müşfiq haqsız yerə həbs edilmiş və cəmi 29 yaşında həyatına son verilmişdir. Lakin onun poetik irsi zamanın sınağından keçmiş, bu gün də öz aktuallığını qorumaqdadır. Şairin ədalətsiz repressiyaya məruz qalması Azərbaycan ziyalılarının taleyindəki acı səhifələrdən biri kimi xatırlanır.
Hazırda Mikayıl Müşfiqin xatirəsi müxtəlif formalarda əbədiləşdirilib: Bakı şəhərində heykəli ucaldılıb, küçələrə və məktəblərə onun adı verilib, əsərləri dəfələrlə nəşr olunaraq oxuculara təqdim edilib.
Mikayıl Müşfiqin ad günü təkcə bir şairin doğum tarixi deyil, eyni zamanda Azərbaycan poeziyasının saf duyğularla zəngin, yüksək bədii dəyərlərə əsaslanan ənənəsinin təntənəsidir.
Aysel
