Hər gün qonşu kəndə məktəbə getmək üçün piyada kilometrlərlə yol qət edirlər...
Qubanın Kardaş kəndinin sakinləri yaranmış vəziyyətlə bağlı "Xəzər Xəbər"ə müraciət ediblər. Onların sözlərinə görə, kəndlərində modul tipli məktəb fəaliyyət göstərsə də, burada təhsil dördüncü siniflə məhdudlaşır. Övladları təhsillərini davam etdirmək üçün qonşu Pirvahid kəndində yerləşən orta məktəbə üz tuturlar. Təxminən 15-16 şagird hər gün 12 kilometr yol getməli olur:
Uşaqların valideynlərini narahat edən təkcə məsafə deyil, həm də yolun təhlükəli olmasıdır. Onlar bildirirlər ki, soyuq və yağışlı havalarda vəziyyət daha da çətinləşir.
Quba-Xaçmaz Regional Təhsil İdarəsindən "Xəzər Xəbər"ə bildirilib ki, Kardaş kənd ibtidai ümumtəhsil məktəbi yalnız ibtidai təhsil səviyyəsi üzrə fəaliyyət göstərir. Şagirdlərin daşınması isə valideynlər tərəfindən təmin olunmalıdır.
İdarədən o da bildirildi ki, şagirdlərin daşınması imkanları ilə bağlı valideynlərin müraciətləri əsasında Regional Təhsil İdarəsində müvafiq dəyərləndirmələr aparılır.
