Tarixi günlər yaşayırıq. Gözlədiyimiz xoş Zəfər xəbərlər ard-arda gəlir. Qazaxın 4 kəndinin bir güllə atmadan qaytarılması Azərbaycan Prezidenti İlham Əliyevin həyata keçirdiyi siyasətin Qələbəsidir. Azərbaycan diplomatiyasının Qələbəsidir. Bir güllə atmadan, işğal altında olan, amma anklav olmayan 4 kəndimizin geri qaytarılması ilə bağlı delimitasiya və demarkasiya komissiyalarının əldə etdiyi razılıq xəbərini böyük sevinclə qarşıladlıq. Bu, həqiqətən də Qələbədir. O deməkdir ki, mərhələli şəkildə bizim digər 4 kəndimiz də geri qaytarılacaq. Sərhədlərin koordinatlarının dəqiqləşməsi ilə yanaşı, Zəngəzur dəhlizinin və digər kommunikasiyaların da işə düşməsi məhz bu danışıqlar nəticəsində mümkün olacaq. Bu, Azərbaycanın son dövrlərdə artan gücünün və Prezident, Ali Baş Komandan İlham Əliyevin çox səbir və təmkinlə həyata keçirdiyi siyasət nəticəsində mümkün oldu.
Bu fikirləri "İki sahil”ə açıqlamasında Milli Məclisin deputatı Naqif Həmzəyev bildirdi.
Deputat qeyd etdi ki, bəzi qüvvələr Azərbaycana təzyiq etmək, ölkəmizi yolundan döndərmək istəyirdilər, dövlətimizi təsir altına salmaq istəyirdilər. Ermənistanı qızışdıraraq, cəsarətləndirərək bu prosesin baş tutmasını istəməyən tərəflər var idi. Azərbaycan isə bütün təzyiqlərə baxmayaraq müstəqil siyasəti, gücü, diplomatiyası ilə qarşısına qoyduğu məqsədlərə nail olur. Rus sülhməramlılarının vaxtından öncə bizim torpaqlarımızı tərk etməsindən sonra şərti sərhədlərdə dəqiqləşdirmə ilə əlaqədar komissiyanın razılığa gəlməsi və may ayının 15-dək bu prosesin ilkin mərhələsinin yekunlaşması çox böyük bir uğurdur. Mən Prezident, Ali Baş Komandan İlham Əliyevə dərin təşəkkürümü bildirirəm və Azərbaycan xalqını təbrik edirəm. İnanıram ki, bu Zəfər müjdəli xəbərləri biz tez-tez eşidəcəyik.
Naqif Həmzəyev vurğuladı ki, regionda uzunmüddətli və dayanıqlı sülhün əldə olunmasında əsas təşəbbüskar olan Prezident İlham Əliyev Cənubi Qafqazda stabilliyi və əmin-amanlığı tam təmin edəcək. Bütün regionumuz Azərbaycan kimi stabillik adasına çevriləckdir və qlobal məkanda baş verən münaqişələr fonunda ölkəmiz və Cənubi Qafqaz inkişaf edəcək.
