Ötən gün Ermənistanın paytaxtı İrəvanda böyük mitinq olub. Müxalif partiyaların nümayəndələri mitinqin keçirildiyi meydana yürüş edib. Ermənistan fraksiyaları hazırki hakimiyyətə qarşı bəyanat qəbul edib. Bəyanatda Azərbaycan və Türkiyə ilə münasibətlərin normallaşması istiqamətində irəli sürülən əsas prinsiplərin yerinə yetirilməməsi tələb olunur.
Bəs Ermənistan hazırki çətin durumda Azərbaycanla sülh müqaviləsi bağlaya biləcəkmi?
Milli Məclisin deputatı Elman Məmmədov AZXEBER.COM-a açıqlamasında deyib ki, belə vəziyyətdə onlarla sülh bağlamaq, sülh şəraitində yaşamaq çətin olacaq.
O, qeyd edib ki, ermənilər mitinqlərdə də revanşist fikirlər səsləndirirlər:
"Ermənilərin bu çağırışlarında məntiqlə belə çıxır ki, özlərinin Azərbaycana qarşı olan düşmənçilik və işğalçılıq siyasətindən əl çəkmək fikrində deyillər. Yəni, onlar sərsəm şərtlər irəli sürürlər, Qarabağın status məsələsindən danışırlar, sərhədlərin müəyyənləşməsi məsələsində problemlər yaradırlar. 44 günlük müharibənin qurtarmasından il yarımdan çox keçməsinə baxmayaraq hələ də Ermənistan dövlətinin silahlı birləşmələrinin bir hissəsi Azərbaycan ərazisində qalmaqda davam edir. 30 ildən artıq müddətdir ki, Azərbaycan ərazisində 1991-ci ildən bunlar tərəfindən özləri üçün yaradılmış seperatçı, cinayətkar, terrorçu "Arsax” adlanan qurum bu gün də mövcudluğunu saxlayır.
Bu hərəkətlərindən də geri çəkilmək fikrində olmadıqlarını bəyan edirlər. Mitinqlərdə də belə revanşist fikirlər səsləndirirlər. Eyni zamanda bunlara xaricdən fətva verən qüvvələr yenə fəallaşıb. Belə vəziyyətdə onlarla sülh bağlamaq, sülh şəraitində yaşamaq çətin olacaq”.
Aydın Nuri
