Dövlət başçısı İlham Əliyev Azərbaycan Respublikasının Baş prokurorunu vəzifəyə təyin olunması ilə əlaqədar qəbul edərkən ölkədə korrupsiyaya qarşı amansız mübarizə aparılması ilə bağlı prinsipal mövqeyini bir daha diqqətə çatdırıb, tətbiq edilən məsuliyyət tədbirlərinin təkcə yerli icra hakmiyyəti orqanları ilə kifayətlənməyəcəyini, cəmiyyətin əsaslarını sarsıdan çirkin əməllərə yol verən bəzi mərkəzi icra hakimiyyəti orqanlarını da əhatə edəcəyini açıq bildirib.
Bəs görəsən siyasi partiya sədrləri bu islahatları necə dəyərləndirir?
Azərbaycan Demokrat Partiyasının sədri Sərdar Cəlaloğlu AZXEBER.COM-a açıqlamasında deyib ki, ictimaiyyət bu məsələdə dövlət başçısının ətrafında birləşməlidir:
"Əgər ictimaiyyət birmənalı şəkildə prezidentin ətrafında birləşib, korrupsionerlərə qarşı mübarizə aparsa, bu islahatların davamlı olacağını düşünürəm. Düşünürəm ki, indi hakimiyyətdə olanların bir çoxu vəzifəsindən uzaqlaşdırılmalı, yeni fikirli insanlar təmsil olunmalıdır”.
O bütün icra hakimiyyətlərində yoxlamanın tərəfdarı olduğunu deyib:
"Bir neçə yox, bütün icra hakimiyyətlərini eyni səviyyədə yoxlamaq lazımdır. Həbs edilən korrupsionerləri məhdudlaşdırmaqla kifayətlənmək lazım deyil. Korrupsiya maşınını məhv etmək lazımdır. Korrupsiyanı meydana alan ictimai-siyasi münasibətləri dəyişmək lazımdır. Ona görə də korrupsiyaya qarşı mübarizə digər islahatlarla paralel şəkildə həyata keçirilməlidir”.
Günel Hüseynli
AZXEBER.COM
