Böyük Türk alimi qürbətdə öldü, vətənində dəfn edildi

Məşhur Krım-tatar yazıçısı Çingiz Dağçı oktyabrın 2-də doğulduğu Ukraynanın Qızıldaş kəndində dəfn edilib. Çingiz Dağçı sentyabrın 22-də yaşadığı Londonda 92 yaşında vəfat etmişdi. O, böyük vətən müharibəsində əsir düşəndən sonra Ingiltərədə yaşayıb. Ömrünün sonunadək anadan olduğu yerlərə gəlmək imkanında olmayıb. Krım türklərinin milli davası barədə çoxsaylı əsərlərin müəllifi olan Çingiz Dağçı krım türklərinin ağsaqqalı sayılırdı. Bəzi əsərləri Türkiyənin dərsliklərinə salınan böyük yazar həm də Türkiyə sevdalısı kimi tanınıb. Təəssüf ki, ömrü boyu o, türkcə yazmasına və böyük türk sevgisinə baxmayaraq, Türkiyəyə gedə bilməyib.Yazarın anadan olduğu torpaqda dəfn olunmasının təşəbbüskarı və təşkilatçısı Türkiyə hökuməti olub. Bu haqda “Azadlıq” qəzetini Çingiz Dağçının cənazə törəninə və dəfninə qatılan AXCP sədrinin müşaviri Fəhmin Hacıyev məlumatlandırıb. Fəhmin Hacıyev təəssüflə bildirib ki, böyük türk aliminin dəfn mərasiminə nə Azərbaycanın Ukraynadakı səfirliyindən, nə də diaspor təşkilatlarından heç kim qatılmayıb. Bunun tam tərsi olaraq isə Türkiyə hökuməti başda xarici işlər naziri Əhməd Davudoğlu ilə mədəniyyət və turizm naziri Ərtoğrul Günay olmaqla 200 nəfərlik heyətlə dəfndə iştirak edib. Cənazə törənində çıxış edən Davudoğlu bildirib ki, böyük elm adamının ölümündə o, BMT-nin yığıncağında ikən telefonuna gələn mesajdan xəbər tutub. Bundan dərhal sonra o, Ingiltərə və Ukrayna hökumətləri arasında danışıqlara başlayaraq dəfnin Krımda baş tutmasına nail olub.AXCP funksioneri deyir ki, cənab Davudoğlu mərhumun şəxsiyyəti və fəaliyyəti ilə bağlı təsirli çıxış edib, onu Ismayil bəy Qaspralıdan sonra Krım tatarlarının ən böyük oğlu adlandırıb.Türk dünyasına baş verən itki ilə bağlı Fəhmin Hacıyev AXCP və onun sədri Əli Kərimlinin, Azərbaycan milli demokratik düşərgəsinin adından Krım tatarları məclisinin sədri Musfata Cəmiloğluna başsağlıqlarını yetirib.