"Bu günlərdə üç böyük kişini yola saldıq. Atamı, böyük yazıçı Elçin Əfəndiyevi və muğam sənətimizin dirəyi Arif Babayevi".
AZXEBER.COM xəbər verir ki, bunu sosial şəbəkə hesabında teleaparıcı Xoşqədəm Hidayətqızı yazıb.
Aparıcı son itirdiyimiz sənətkarların itkisindən məyusluğunu bu sözlərlə dilə gətirib:
"Üç fərqli yol, üç fərqli həyat, üç müxtəlif peşə. Amma bir ortaq cəhət vardı, o da kişilik. Atam mənə insan olmağı, vicdanlı, ədalətli və dürüst olmağı öyrədən ilk adam idi. Onun gedişi mənim üçün dağ boyda bir itki oldu. Elə bil köhnə kişiliyin bir səhifəsi bağlandı. Elçin təkcə yazıçı deyildi. O, bir dövrün aynası idi. Sözün, fikrin, sənətin təmizliyini qoruyurdu. Yazdıqları bizi güldürmürdü, düşündürürdü. Bəzən danışmırdı, amma baxışları danışırdı.
Arif Babayev - muğam onun səsində nəfəs alırdı. Böyük bir səs, böyük bir insan idi. O səsin altında zəhmət vardı, əziyyət vardı, kişi duruşu vardı. Nə sənətini, nə özünü bayağılaşdırmadı. Kişi səsi ilə oxudu, kişi ürəyi ilə yaşadı. Onlar ayrı-ayrı yolun yolçusu idilər. Amma eyni bir dəyərlə yaşayırdılar - kişiliklə!
Bu itkilər təkcə üç nəfərin yoxluğu deyil. Bu, bir nəsil kişiliyin, bir dövr insanlığın, bir mədəniyyətin sükutla çəkilib getməsidir. Ağladım bu itkilərə, ağladım bu dünyadan bir-bir köçən köhnə kişilərə. Məkanınız cənnət olsun. Ruhlarınız qarşısında baş əyirəm".
Aysel
